Duha ka dagkong sunog ang niigo sa managlahing dapit sa dakbayan sa Sugbo niadtong Sabado sa gabii, Enero 6, 2024.
Sa kinatibuk-an, 210 ka mga pamilya ang nawad-an og pinuy-anan.
Unang sunog nahitabo sa Sityo Kalapukan, Barangay Carreta, alas 9:21 sa gabii, niabot sa 3rd alarm.
Gawas sa mga bombero sa siyudad sa Sugbo, nitubag sa alarma ang mga bombero gikan sa mga dakbayan sa Mandaue, Lapu-Lapu ug Talisay.
Sumala sa Cebu City Fire Office (CCFO), nikabat sa 66 ka mga balay ang nasunog ug nagbilin sa danyos nga P4.5 milyunes.
Dugang sa CCFO, ang sunog nagsugod sa balay nga gipanag-iya ni Emilia Colongan nga gipuy-an ni Eusebia Pardillo ug kaubanan.
Sa pasiunang imbestigasyon ni Fire Officer 3 Fulbert Navarro sa Bureau of Fire Protection-CCFO, nasayran sa Superbalita Cebu nga gawas sa balay ni Colongan nga kabahin sa 66 ka mga balay nga nasunog, ang 60 niini maoy hingpit nga naugdaw.
Dili mominos 90 ka pamilya nga gilangkuban sa 400 ka mga tawo, ang nangapektuhan sa maong sunog.
Hinuon, way gikataho nga napaso o nakalas sa maong sunog.
Atol ning pagsuwat, ang BFP-CCFO nagpadayon sa ilang imbestigasyon sa sinugdanan sa sunog apan ilang gisubay ang posibilidad nga ‘electrical misuse.’
Samtang, ang ikaduhang sunog nahitabo sa luyo sa Wetlands sa Sityo Kanipaan, Brgy. Basak Pardo, alas 11:33 sa gabii ug gipasaka usab sa 3rd alarm.
Sa imbestigasyon ni SF01 Riza V. Julve, fire investigator sa BFP-CCFO, nasayran sa Superbalita Cebu nga ang sunog nagsugod sa panimay nga gipanag-iya ni Biano Nedia nga gipuy-an ni Dian Nedia ug mga kauban.
Ang maong sunog nakaapekto sa 95 ka mga balay apan 90 niini ang hingpit nga naugdaw sa kayo.
Dili mominos 120 ka pamilya nga gilangkuban sa 420 ka tawo, ang nawad-an og pinuy-anan.
Nagbilin kini og P5.26 milyunes nga danyos.
Sama sa unang sunog, ang mga bombero nagsubay nga posibling ‘electrical misuse’ usab ang hinungdan sa pag-ulbo sa kayo.
Naangol sa maong insidente si Criestel Mae Barrientos, 21, dalaga, kinsa nakaangkon og samad sa iyang agtang.
Ang mga biktima sa duha ka mga sunog gipahiluna sa gym sa barangay samtang ang uban sa temporaryo nga mga gambalay.
Gihatagan sila og ayuda nga pagkaon ug kagamitan sa City Social Welfare and Development Office (CSWDO) ug sa kagamhanan sa barangay.