NAMATAY diha-diha ang usa ka 22 anyos nga lalaki human pusila sa giingong kakompetensya sa illegal nga drugas samtang nag-inom kauban sa iyang mga higala sa Lower Phase 3, Sitio Kadasig, Barangay Tisa, Dakbayan sa Sugbo alas 8 p.m. sa Dominggo, Marso 24, 2024.
Ang biktima nga gideklarar nga patay na sa medical team nga nitubag sa emerhensya giila nga si John Robert Avenido Ectana, nagpuyo sa lugar.
Sa imbestigasyon sa Labangon Police Station sa pagpangulo sa hepe niini nga si Police Major Eraño Regidor, samtang nag-inom ang biktima uban sa iyang mga barkada, kalit lang niabot ang gunman ug dayong pusil sa biktima sa makadaghang mga higayon.
Drugas ang usa sa gitan-aw nga motibo sa krimen, matod ni Regidor, sanglit ang biktima ug killer nalambigit sa ilegal nga drugas.
Giingong nagkainitay ang duha tungod sa kompetensya sa pagpamaligya sa ilegal nga drugas sa lugar. (AYB)