Mga vendor sa dakbayan sa Sugbo angay nang magbantay, magseguro nga ang ilang gigamit nga mga timbangan di depektuso.
Gisilutan sa Office of the City Markets (OCM) ang labing minos 223 ka mga vendor tungod sa paggamit sa depektuso nga mga timbangan gikan sa Enero hangtod Disyembre sa 2023.
Matod sa taho sa Cebu City News and Information, si John Paul Amores, information officer sa OCM, nibutyag nga sagad sa mga nakalapas mga ambulant vendor.
Matod ni Amores nga gisakmit sa OCM ang mga faulty weighing scale human nakadawat og mga reklamo gikan sa mga mamalitay nga sila gilimbungan sa pipila ka mga vendor sa main ug satellite markets sa dakbayan.
Ang OCM maoy nagdumala sa Carbon Market Units 1, 2 ug 3, Freedom Park ug Warwick Barracks, Pasil Fish Market, ug mga merkado publiko sa Cogon Ramos, Poblacion Pardo, Taboan ug T. Padilla.
Matod ni Amores nga sa miaging tuig ang OCM nakatutok sa ilang monitoring sa wet market section sa Carbon Market.
Siya niingon nga ang OCM mosakmit sa mga timbangan kon di tukma ang pagbasa niini sa gitimbang.
Si Amores niingon nga ang Market Code sa dakbayan nag-ingon nga ang mga rehistradong vendor nga masakpang migamit og depektusong weighing scale kun timbangan mahimong mag-atubang og silot, sama sa hangtod sa tulo ka buwan nga kantidad sa ilang abang.