23 anyos nga dalaga, gipusil-patay sa menor

GIHILING: Ang lawas sa 23 anyos nga dalaga nga gipusil-patay sa Barangay Suba, dakbayan sa Sugbo, alas 3:00 sa kaadlawon sa Dominggo, Marso 10, 2024, gihiling sa mga sakop sa Scene of the Crime Operatives (Soco) sud sa usa ka punerarya.  /
GIHILING: Ang lawas sa 23 anyos nga dalaga nga gipusil-patay sa Barangay Suba, dakbayan sa Sugbo, alas 3:00 sa kaadlawon sa Dominggo, Marso 10, 2024, gihiling sa mga sakop sa Scene of the Crime Operatives (Soco) sud sa usa ka punerarya. / TAMPO

Usa ka 23 anyos nga dalaga gipusil-patay sa 16 anyos nga lalaki sa Block 1, Sitio Buwaran, Barangay Suba, dakbayan sa Sugbo, alas 3:00 sa kaadlawon, Do­ming­go, Marso 10, 2024.

Ang biktima mao si Mylene Dumalaoco, 23, molupyo sa naasoy nga dapit ug ang menor de edad nga suspek taga Balancapun, Barangay Sambag 1, siyudad sa Sugbo.

Sa pakisusi sa Superba­lita Cebu sa pasiunang imbestigasyon ni Police Chief Master Sgt. Diosdado Parejas, investigator on case sa Sawang Calero Police Station 6 sa Cebu City Police Office (CCPO), ubos sa ilang station commander nga si Police Maj. Francis Talosig, nasayran nga ang biktima padulong na unta nga matulog ug nihigda sa folding bed sud sa payag sa pamilya sa maong dapit.

Sumala sa mga saksi, kalit niabot ang suspek ug ilang nadunggan nga nangutana ngadto sa biktima kon asa ang iyang cellphone.

Matod pa, ang biktima nitubag nga wa siya masayod kon asa ang cellphone niini ug dayong gipusil sa suspek.

Ang biktima naigo sa iyang ulo ug hinungdan nga nakurat ang mga tawo sa palibot da­yong sibat sa suspek.

Ang medical team sa dakbayan nga niresponde sa maong pagpamusil mao ang nideklarar sa biktima nga dead on the spot.

Ang Scene of the Crime Operatives (Soco) sa PNP naka-recover og usa ka buhing bala sa .9mm nga kalibre sa armas.

Atol ning pagsuwat, ang suspek sa pagpamusil pada­yon nga gipangita ug ang kapulisan blangko pa bahin sa motibo sa pagpamusil ug kabahin sa nadunggan sa mga saksi sa pagpangita sa suspek sa iyang cellphone.

Si Parejas nagkanayon nga usa sa ilang unang nasayran nga way relasyon ang suspek ngadto sa biktima hinungdan sa kalibog bahin sa maong kaso ug kon nganong naabot ang suspek sa maong dapit.

Dugang nasayran sa kapulisan nga nanagsikit ang kabalayan sa dapit ug daghang tawo sa dan bisan sa lawom na nga kagabhion./ DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph