Gi-deploy sa Cebu Port Authority (CPA) ang 23 ka K9 Units aron palig-unon ang seguridad sa tanang pantalan sa Sugbo, agi’g pagpangandam sa pagdagsa sa daghang pasahero sa Semana Santa ug sa summer vacation.
Sa opisyal nga pamahayag sa CPA nga gipublikar sa ilang official Facebook page niadtong Biyernes, Abril 11, 2025, gipahibalo nga ang tanang pantalan sa Sugbo ipahimutang sa heightened alert gikan sa Abril 13 hangtod 20, isip kabahin sa nasudnong pagpatuman sa “Oplan Biyaheng Ayos: Semana Santa ug Summer Vacation 2025” nga gipangulohan sa Department of Transportation (DOTr).
“To strengthen the security, the CPA developed it’s own 23 K9 units,” tipik sa maong post.
Ang CPA nakahukom pagdugang og K9 alang sa ilang tinguha nga mapadayon ang pagpalig-on sa seguridad sa pantalan, ilabi na sa panahon nga adunay dagkong kalihukan.
Ang mga K9 units gilangkuban sa Explosive Detection Dogs (EDD) ug Narcotics Detection Dogs (NDD), nga gamiton sa paghimo og mga inspection aron malikayan ang pagsulod sa mga ilegal nga drugas aron masiguro ang kaluwasan sa mga pasahero sa sulod sa pantalan.
Gihatagan og gibug-aton ni CPA General Manager Francisco C. Comendador III ang kamahinungdanon sa kalig-on sa seguridad sa panahon sa mga peak travel seasons, nga ang CPA Operations Center mag-operate sud sa 24/7.
Gawas sa pag-deploy sa K9, kapin sa 400 ka mga polis ang magbantay sab sa pantalan.
Samtang duha ka mga patrol boat ang ibutang sa Cebu Baseport aron bantayan ang mga kalihokan sa kadagatan.
Ang CPA nakigtambayayong usab sa Philippine Coast Guard (PCG), Maritime Industry Authority (MARINA), Philippine National Police (PNP), ug Philippine Drug Enforcement Agency (PDEA) aron palig-onon ang seguridad sa pantalan.
Gipahinumduman ni Comendador ang mga pasahero nga planuhon ang ilang mga biyahe ug mosayo og abot sa pantalan, ug likayan ang pagpalit og mga tiket gikan sa mga fixer.
Ang CPA magpatuman sa estrikto nga “No Ticket, No ID, No Entry” nga polisiya aron mapadali ang pagkontrol sa daghang mga tawo. / CDF