Niabot ngadto sa 24 ang ihap sa mga nangamatay tungod sa hiniusang epekto sa southwest monsoon (habagat) ug tropical cyclones Ferdie, Gener, ug Helen, sumala sa sa National Disaster Risk Reduction and Management Council (NDRRMC), Biyernes, Setyembre 20, 2024.
Sa usa ka situational report, ang disaster bureau nagkanayon nga sa 24 ka patay tungod sa epekto sa weather systems, siyam gikan sa Mimaropa, lima gikan sa Western Visayas, upat gikan sa Zamboanga Peninsula ug Bangsamoro regions, ug duha gikan sa Central Visayas.
Nakatala usab kini og lima ka rain-induced landslides, tulo ka maritime incidents, pito ka nangatumba nga kahoy, usa ka nahugno nga estraktura, ug pito ang nadaot tungod sa hangin.
Ang NDRRMC nagkanayon nga adunay kinatibuk-ang 356,578 ka pamilya o 1,303,677 ka tawo sa 1,850 ka barangay ang apektado sa dili maayong panahon diin 10,310 ka pamilya o 40,551 ka indibidwal ang milayas sa 291 ka evacuation centers.
Ang Mimaropa ang adunay labing daghang pamilya nga namakwit nga 3,314 o 11,823 ka indibidwal.
Ang Department of Social Welfare and Development (DSWD) nihatag og kapin sa P39 milyones nga kantidad sa hinabang sa mga apektadong indibidwal.
Kapin sa P22.5 milyunes nga kantidad sa imprastraktura ang nadaot sa mga apektadong rehiyon, sama sa Mimaropa, Western ug Central Visayas, Northern Mindanao, Davao, Soccsksargen, Caraga, ug Cordillera.
Niadtong Biyernes sa buntag, ang tanan nga sistema sa panahon migawas na sa Philippine Area of ​​Responsibility. / TPM / SunStar Philippines