Miabot na sa 24 ang natala sa National Disaster Risk Reduction and Management Council (NDRRMC) nga nakalas tungod sa mga nangagi nga bati nga panahon sa nasod dala sa habagat ug bagyong Ferdie, Gener, ug Helen.
Base sa situational report sa disaster bureau nga sa 24 ka mga patay, siyam niini gikan sa Mimaropa, lima ang gikan sa Western Visayas, upat ang gikan sa Zamboanga Peninsula ug Bangsamoro regions, ug duha sa Central Visayas.
Nakatala usab kini og lima ka pagdahili sa yuta tungod sa grabeng uwan, tulo ka mga insidente sa kadagatan, pito ka mga natumba nga kahoy, usa ka nahugno nga edipisyo, ug pito ka mga makaguba nga hangin.
Sumatotal miabot sa 356,578 ka mga pamilya o 1,303,677 ka mga indibidwal ang natala sa NDRRMC sa 1,850 ka mga barangay nga apektado sa bati nga panahon diin 10,310 ka pamilya o 40,551 ka mga indibidwal niini ang namasilong una sa 291 ka evacuation centers.
Ang Department of Social Welfare and Development (DSWD) sa ilang bahin mitunol og kapin P39 milyones nga kantidad agi'g hinabang sa mga apektado nga pamilya.
Miabot usab sa P22.5 million ang kantidad sa imprastraktura ang naguba diin apektado ang Mimaropa, Western ug Central Visayas, Northern Mindanao, Davao, Soccsksargen, Caraga, ug Cordillera. / TPM / SunStar Philippines