Patay ang usa ka lalaki human nalumos samtang namana sa kadagatan sa Purok 7, Barangay Candabong, Lungsod sa Anda, Probinsiya sa Bohol alas 11:50 sa buntag, Lunes, Hulyo 14, 2025.
Ang biktima giila sa iyang mga kabanay nga si Dolphy Urbano, 25, ulitawo nga nagpuyo ra sab sa maong lugar.
Sa nigawas sa imbestigasyon sa Anda Municipal Police Station sa Bohol Police Provincial Office nga unang nakadawat og tawag sa telepono ang Anda Tourist Police Unit gikan sa staff sa usa ka resort nga dunay lalaki nga namana ang napalgan na lang nga wala nay kinabuhi.
Dali nga niresponde ang kapulisan sa dapit diin napalgan ang bitima pinangulohan ni Police Executive Master Sergeant Jonathan Deloso ug ila ning naabtan nga nagbuy-od nga nigahi na ang lawas.
Gihiling sab sa Anda Municipal Health Officer nga si Doctor Rosario Tinio uban sa Philippine Coast Guard personnel ang biktima ug nigawas nga ang gikamatyan mao ang pagkalumos ug wala silay nakitang foul play.
Sigon sa mga kabanay nga nianang sayo sa buntag, nananghid ang biktima nga mamana.
Apan nakurat na lang sila nga gipahibalo sa mga polis nga nalumos siya ug patay na nga napalgan nga naglutaw-utaw sa kadagatan sa maong dapit. / AYB