Mokabat sa 25 ka scholars sa Technical Education and Skills Development Authority (TESDA) gikan sa Olango Island sa Lapu-Lapu City ang nigradwar sa electrical installation program.
Gidayeg ni Mayor-elect Cynthia “Cindi” King-Chan atol sa seremonyas niadtong Biyernes, Hunyo 20, 2025, ang mga nakatapos sa Electrical Installation and Maintenance NC II program.
Gihulagway niya kini nga usa ka klarong pruweba sa padayong paningkamot sa siyudad sa pagpalambo sa kinabuhi sa mga residente pinaagi sa pag-develop sa ilang skills.
Matod ni Chan nga ang mga molupyo gikan sa Olango Island malampusong nakahuman sa ilang 25 ka adlaw nga pagbansay sa Electrical Installation and Maintenance.
“Suportahan namo kamo hangtod nga makabarog kamo sa inyong kaugalingon ug makatabang dili lang sa inyong kaugalingon, apan labaw sa tanan, sa inyong mga pamilya,” ingon ni Chan.
Dugang niya ang kamahinungdanon sa determinasyon ug paglahutay sa pag-angkon og kasinatian sa trabaho isip importanteng lakang padung sa kalampusan ug pag-uswag sa karera.
Ang grupo sa mga nigradwar nga nagbansay sa Saint James Academy of Skills Technology, Inc. gikan sa mga isla nga Barangay sa Talima, Tingo, Baring, Sabang, Tungasan, Sta. Rosa, ug San Vicente.
Gawas sa hands-on nga pagbansay, ang matag nigradwar nakadawat og NC II Certificate ug allowance nga P4,000, nga nakatabang kanila sa pagtagbo sa inisyal nga mga kinahanglanon sa pagpanarbaho.
Mga Oportunidad sa Trabaho
Si Kim Francisco, pangulo sa Public Employment Service Office (PESO) sa Lapu-Lapu, sa usa ka mensahe nga gipadala sa SunStar Cebu niadtong Sabado, Hunyo 21, nagkanayon nga ang maong mga indibidwal irekomendar sa mga dagkong kompanya sa Mactan Export Processing Zone ug uban pang mga kompanya sa tibuok Lapu-Lapu City.
Matod niya nga kini ang mga kompanya nga nanginahanglan og mga electrician nga adunay NC II certification.
“Ang mga oportunidad sa trabaho alang kanila mao ang pagka-electrician sa nagkalainlaing industriya sama sa manufacturing ug construction,” ingon ni Francisco. / DPC