KAPIN sa usa ka milyon ka pesos nga balor sa illegal nga drogas ang nasakmit, samtang 25 ka mga drug suspects ang nasikop atol sa dungan nga anti-criminality operation sa Police Regional Office (PRO 7) sulod sa 24 oras gikan sa alas 6 sa buntag sa Hunyo 20, 2025 ngadto sa alas 5:59 sa buntag sa Hunyo 21, 2025.
Gilusad ang dungan nga operation sa pakig-alayon sa Armadong Kusog sa Pilipinas ug Regional Highway Patrol Unit 7.
Mokabat sa 162.94 ka gra-mos sa gituohang shabu ang ilang nasakmit nga dunay stan-dard drug price nga P1,107,992 atol sa 25 ka anti-illegal drug operations nga miresulta sa pagkasikop sa 25 ka mga suspetsado.
Ang Cebu City Police Office nakaimbargo og 104 gramos nga shabu nga mobalor sa P710,872 diin walo ka drug suspects ang ilang naposasan nga gisundan sa Bohol Police Provincial Office nga dunay 25.79 gramos nga mokantidad sa P165,372, samtang ang Cebu Police Provincial Office nakakuha og 25.43 gramos nga shabu nga mobalor sa P172,924.
Nakasikop usab ang PRO 7 og 18 ka indibidwal nga dunay mga pending warrant of arrest sa lain-laing matang sa kaso.
Gihingusgan usab nila ang kampanya batok loose firearms diin nakakuha sila og tulo ka armas nga way lisensya.
Samtang moabot usab sa 593 ka local ordinance violations ang nadokumento sa mga kapulisan nga naglangkob sa curfew, smo-king bans ug traffic offenses.
Gihangop sa hepe sa PRO 7 ang maong kalampusan.
“With every operation, we are delivering on our pledge: Sa Bagong Pilipinas, ang Gusto ng Pulis, Ligtas Ka! And under the PRO7 banner, we will continue moving forward—stronger, faster, and always grounded in integrity,” matud ni Police Brigadier General Redrico Atienza Maranan, hepe sa PRO 7. / AYB