Sulod sa tibuok buwan sa Mayo 2025, nakasakmit na ang kapulisan sa Dakbayan sa Sugbo og 25 ka armas subay sa kampanya batok loose firearms.
Matod ni Police Lieutenant Colonel Maria Theresa Macatangay deputy city director for operation sa Cebu City Police Office (CCPO) nga pito niini ilang nasakmit sa pag-serve sa search warrant, usa sa checkpoint ug ang uban nakuha atol sa mga police operation.
Nipasabot ang opisyal nga dunay mga madawat nila nga kasayuran nga ang usa ka drug personality ang magdaladala og armas nga target sa ilang operation hinungdan nga gironda.
“This is because naay mga information nakaabot sa kapulisan nga kini siya nga personality is bearing loose firearms and likewise engage in illegal activities,” matod ni Macatangay.
Ang tanan nga nakuha nga armas mga pinalit sa Dakbayan sa Danao.
Matod ni Macatangay nga mao ni ang hinungdan nga ang Police Regional Office 7 niseryoso sa pag sakmit sa mga kagamitan sa paggama og armas nga naa sa mga barangay sa Danao.
Nidugang si Macatangay nga ang CCPO pinaagi sa ilang hepe nga si Police Colonel Enrico Figueroa nimando sa iyang mga sakop nga pahugtan ang ilang police operations batok loose firearms lakip na ang
Comelec checkpoints gumikan kay ang gun ban hangtod pa sa Hunyo 11 sa tungang gabii. / AYB