Mokabat sa 13 ka mga mananagat nga taga lungsod sa Boljoon ug 12 gikan sa lungsod sa Alcoy nadakpan sa mga awtoridad samtang ilegal nga nanagat sa kadagatan sa lungsod sa Dalaguete.
Ang uban kanila ninggamit og commercial nga panagatan sulod sa municipal waters nga gidili sa balaod. Naa say ninggamit og mga pukot nga gagmay og buho.
Sa follow-up sa Superbalita Cebu, ang kapulisan sa Dalaguete nga gipangulohan sa ilang hepe nga si Police Maj. Clemente Ceralde Jr. ug Dalaguete Municipal Agriculture and Natural Resources Office (MANRO) nga gipangulohan ni Pedro Amacna, nagkanayon nga ang ilang seaborne patrol operation mao ang nakasikop sa mga mananagat.
Alas 8:30 sa buntag sa Huwebes, Nobiyembre 9, 2023, 13 ka nga mananagat nga nakalapas sa ilang municipal ordinance nga nagdili sa pino og buho nga pukot, taga Barangay Granada sa Boljoon, nasikop.
Nadakpan usab ang nag-commercial fishing sa lawod sa Brgy. Casay, Dalaguete kay ang gipanagatan may distansya nga 2.4 kilometro gikan sa baybayon sa lungsod.
Ang commercial fishing gidili sulod sa 15 kilometro gikan sa baybayon.
Ang nakuha nga mga ebidensya mao ang ilang dakong motorbanca, 90 ka kilo nga isdang Burot-Burot ug pukot.
Ang ikaduhang nadakpan mao ang 12 ka mga mananagat nga taga Brgy. Pugalo, lungsod sa Alcoy.
Sila nasikop sa kalawran sa Brgy. Casay sa kapulisan nga gipangulohan sa ilang hepe nga si Major Clemente Ceralde Jr. ug sa Dalaguete MANRO nga gipangulohan ni Amacna.
Ang mga ebidensya mao ang dakong motorbanca, 15 ka kilo nga Malapati nga isda ug pukot.
Ang 25 ka mananagat dali ra hinuong napabuhian sa Dalaguete Police Station human nakamulta og P12,000 matag usa.