Gibana-bana sa kapulisan sa dakbayan sa Sugbo nga nikabat og 250,000 ka mga debotong Katoliko ang ningsalmot sa Walk with Mary nga gisugdan sa alas 2:30 sa kaadlawon, gikan sa Our Lady of Guadalupe paingon sa Fuente Osmeña Rotunda ug niagi sa Osmeña Blvd. paingon sa Basilica Minore del Sto. Niño.
Bisan pa sa pagtaligsik, wala kini makabalda sa mga deboto ni Sr. Sto. Niño ug Birhen sa Guadalupe.
Matod ni Police Lt. Col. Janette Rafter, deputy city director for operations sa Cebu City Police Office (CCPO), malinawon ug hapsay ang Walk with Mary.
Gisunod nila ang oras nga gitagana nga maabot ang mga imahen sa Basilica alang sa Traslacion.
Giestrikto sa kapulisan ang prosisyon diin walay gitugotan nga deboto nga makaduol sa urna aron dili mabalda ang Walk with Mary.
“Magpasalamat kami sa kooperasyon sa tanan kay kasabot gyud mi sa gibati sa tanan ilabi na kay kini usa ra gyud ka panghitabo sa usa ka tuig nga gusto gyud moduol, gusto gyud mosulod sa karosa. Nagpasalamat mi sa ilang pagpaminaw, sa atong mga hangyo nga dili lang gyud nato maalihan ang atong karosa ug ma beat ang oras,” matod ni Rafter.
Way nadawat nga report ang kapulisan nga dunay nabiktima sa kuot o kaha kawat atol sa kalihukan.
Ning nagkaduol na ang Sinulog Grand Parade sa Dominggo, Enero 21, matod ni Rafter, walay hunong ang pagpangandam.
Dili pa siya makabutyag kon siyento porsiyento na bang andam ang ilang mga security plan sanglit wala pa hingpit magsugod ang maong kalihukan.
Awhag lang niya sa publiko nga motuman lang sa lagda nga ilang iimplementar aron maangkon ang hapsay ug luwas nga Sinulog 2024.