Sa kinatibuk-an, moabot sa 259 ka mga aplikante ang na-hire dayon atol sa bag-uhay lang gipahigayon nga mga job fair sa Dumaguete City, SM Seaside City Cebu, ug Bohol, sumala sa Department of Labor and Employment (DOLE) Region 7.
Kini nga ihap mas taas kon itandi sa nakalabay nga tuig nga Labor Day job fairs sa Cebu ug Dumaguete.
Sa usa interbyu sa telepono niadtong Dominggo, Mayo 4, 2025, gipahibalo ni DOLE 7 Public Information Officer Roberto Cabardo nga ang mga job fair nakadani og 939 ka rehistradong job seekers sa tulo ka dapit.
Ang gidaghanon sa mga na-hire dayon karong tuiga nilabaw sa taho sa SunStar Cebu niadtong Mayo 5, 2024.
Sumala sa maong taho, 191 ka mga aplikante ang na-hire dayon sa mga job fair nga gipahigayon sa SM Seaside City Cebu, Cebu City, ug sa Lamberto Macias Sports and Cultural Center sa Dumaguete City niadtong Mayo 1, 2024.
Sa detalyado nga datus karong 2025, ang Dumaguete City adunay 301 ka rehistradong aplikante, diin 62 kanila ang na-hire dayon.
Sa 62 nga na-hire sa Dumaguete, 39 ang lalaki ug 23 ang babaye.
Ang SM Seaside City Cebu adunay pinakataas nga ihap sa rehistradong job seekers nga niabot sa 508, diin 130 kanila ang na-hire dayon.
Ang breakdown sa mga na-hire sa SM Seaside kay 50 ka lalaki ug 80 ka babaye.
Sa Bohol, 130 ka aplikante ang narehistro sa job fair ug 67 kanila ang na-hire dayon. Kini naglakip sa 35 ka lalaki ug 32 ka babaye.
Gipasidunggan ni Cabardo ang kalampusan sa mga job fair sa paghatag og dali nga trabaho sa jobseekers sa rehiyon, ilabi na ang pagsaka sa ihap sa mga na-hire dayon kon itandi sa datos sa miaging tuig.
Iyang gidugang nga sa 939 ka rehistradong aplikante karong 2025, 439 ang lalaki ug 500 ang babaye.
Ang kinatibuk-ang ihap sa mga lalaki nga na-hire dayon sa tanang lokasyon kay 124, samtang 135 ang total nga babaye nga na-hire. / CDF