Moabot sa 26 ka mga empleyado sa kagamhanan sa Dakbayan sa Mandaue lakip na ang officer-in-charge sa Housing and Urban Development Office, assistant head sa Assessor’s Office, ug pangulo sa janitorial services unit ang gipangsuspenso og siyam ka buwan nga walay sweldo human sa ilang pag-padlocked sa usa ka pribadong luna.
Ang buhatan sa Ombudsman nihukom sa reklamo labot sa pag-demolish ug pagkandado sa luna nga giilugan sa kagamhanan sa Mandaue ug ni Maria Priscila Melendres ug Maritoni Melendres nga maoy private claimants.
Si Maria Priscila nga nakadawat sa desisyon sa Ombudsman walay kabutangan sa kalipay nga nahatagan og hustisya ang gidangatan sa ilang giangkon nga luna nga nahimutang sa Barangay Paknaan sa nangaging katuigan.
“Makalipay gyud kaayo nga finally, nakab-ot namo ang hustisya. Dili lalim mabiktima ug grabeng pang-abuso gikan sa gobyerno sa Mandaue,” matod ni s Maria Priscila.
Sa desisyon, nakita nga ang mga opisyal sa kagamhanan sa Dakbayan sa Mandaue sad-an sa “conduct prejudicial to the best interest of the service,” nga ang ang mga respondents , “not clothed with the authority” sa pagpatuman sa demolition.
Ang Notice to Demolish nga gikan sa City Legal Officer gi-addressed sa pangulo sa Office of the Building Official, dili sa bisan kinsa nga mga respondent.
Lakip sa tag-as nga officials nga gipahamtangan sa 9 ka buwan nga suspension nga walay sweldo mao si Johnbee Biton, OIC sa city’s housing department, Julius Caesar Entise, assistant assessor, ug Teodorico Montojo II, ang head sa Janitorial and Security Services Unit.
Ang pag-demolish ug pag kandado sa giawayan nga luna sa Barangay Paknaan nahitabo niadtong Mayo 3, 2023.
Silang Maria Priscila ug Maritoni Melendrez niduso og reklamo ngadto sa korte nga nagkanayon nga ang maong luna ilaha ug ila kining napalit sa ilang apohan.
Naa sila sa sulod sa luna sa dihang gihimo ang pag kandado ug pag-demolish sa mga kawani sa kagamhanan sa Dakbayan sa Mandaue.
Ilang giduso ang mga dokumento ngadto sa buhatan sa Ombudsman pagpamatuod nga ilaha ang maong luna ug ni-file sila og reklamong grave misconduct, conduct prejudicial to the best interest of the service ug violation of the Constitution and the Code of Conduct and Ethical Standards for Public Officials and Employees.
Sa counter-affidavit sa mga city officials nga gisumbong ilang gihimakak nga gibilango ang mga reklamante sanglit duha lang sa tulo ka gate ang ilang gisirado.
Ang maong mga opisyal nihimakak usab sa pasangil ni Melendres nga ilaha ang maong luna nga gitawag nila nga katunggan.
“The City’s directive… was not expressly addressed to any of the respondents. Essentially, respondents were not clothed with any authority in doing the questioned demolition and padlocking. What is more, the same appears to have been done without going through the legal process. By acting with less than a clear and express legal mandate,respondents tarnished the image and integrity of their respective public offices,” nagkanayon ang hukom sa Ombudsman.
Si Assistant Ombudsman Pilarita Lapitan maoy niluwat sa Indorsement nga pinitsahan niadtong Enero 24, 2025 nga nagrekomendar sa pagsuspenso nga walay sweldo sa buhatan sa Human Resource Division sa Mandaue City Government. / AYB