Namalit og metal detectors ug mga baton ang Kagamhanan sa Lungsod sa Minglanilla nga maoy gamiton sa mga security personnel sa mga pampublikong tunghaan sa lungsod.
Kini usa ka paagi sa kagamhanan aron mas mapahugtan ang seguridad sa mga tunghaan, gumikan sa kabalaka sa mga ginikanan tungod sa sunodsunod nga insidente sa pagpamusil nga naglambigit sa mga tinun-an.
Ang Lungsod sa Minglanilla adunay 26 ka mga tunghaan nga gitagsaan og apudapod sa maong mga ekipo ni Minglanilla Mayor Lheslen Enad sa Lunes, Agusto 24, 2026.
"With everything happening around us, I understand the worry of parents who simply want their children to be safe when they go to school everyday," saysay ni Enad sa Agusto 24.
Matod sa mayor nga nasayod siya sa kahangawa sa mga ginikanan sa pagpasulod sa ilang mga anak sa tunghaan ilabi na sa nagkadaghang hulga sa seguridad.
Iyang gihimug-atan nga mas maayo nga andam ang security personnel sa mga tunghaan aron maseguro nga luwas ang tanan nga mga tinun-an nga mosulod sa ilang mga classroom.
Subay niini, gipasalig ni Enad nga pasiuna pa lang ang maong mga gamit ug gitinguha niini nga mahatagan og dugang ekipo ang mga tunghaan aron malikay kini sa risgo. / ANV
