Mokabat sa 27 milyunes ka estudyante ang nibalik sa klase niadtong Lunes, Hunyo 16, 2025, sa pagsu-god sa school calendar 2025-2026.
Matod sa Department of Education (DepEd), apil niini ang mga estudyante gikan sa preschool hangtod sa senior high school sa publiko ug pribadong eskwelahan.
Sama sa ubang lugar labi na sa Metro Manila, nagpabilin nga suliran ang paghuot sa mga estudyante tungod sa kakuwang sa classrooms.
Si DepEd Secretary Sonny Angara sa sayo pa niangkon nga kulang ang nasod og dul-an 165,000 ka classrooms ug kinahanglan sa mga eskwelahan nga magpatuman og class shifting o hybrid learning arrangements aron ma-accommodate ang mga estudyante.
Matod niya moabot og 30 ka tuig aron masulbad ang kakuwang sa classrooms sa nasod, base sa kasamtangang budget alang sa sektor sa edukasyon.
Apan ang ubang opisyal sa DepEd niingon nga moabot og 55 ka tuig aron hingpit nga mawala ang classroom construction backlogs.
Matod ni Angara, padayon ang departamento sa pagpangita og pamaagi aron masulbad ang kakuwang sa classrooms, lakip na ang pinaagi sa public-private partnerships.
Aron masiguro ang kalinaw ug kahusay atol sa pag-abli sa klase ug kaluwasan sa mga tinun-an ug magtutudlo, si Philippine National Police (PNP) chief General Nicolas Torre III nihimo og inspeksyon sa nagkalainlaing eskwelahan sa Metro Manila.
Kini aron masiguro ang igo ug epektibo nga pag-deploy sa mga polis.
Gimanduan niya ang mga police commander nga makig-alayon sa mga opisyal sa eskwelahan sa ilang tagsa-tagsa ka hurisdiksyon aron masuta ang ilang security requirements.
Matod ni Torre, ang street crimes ug bullying maoy usa sa ilang mga unang gikabalak-an taliwala sa pag-abli sa klase.
“Dito sa mga eskuwelahan, unang-una, is sa labas muna, so street crimes. Andiyan ang mga manloloko na alam mo na lolokohin ang mga bata. Maya-maya yan, nanakawan ang mga bata dahil siyempre, murang edad pa ang mga yan. Musmos pa ang mga yan. Maya-maya yan, may mga magse-setup, makukuha nila yung bag, may lamang cellphone, so yan ang mga target niyan,” matod ni Torre .
“Pangalawa, sa loob naman ng eskuwelahan, we are coordinating with the schools na siguraduhin natin walang bullying, walang mga krimen na makakabiktima ng ating mga estudyante,” dugang niya.
Ang PNP nag-deploy og 37,740 ka personnel sa tibuok nasod aron masiguro ang kaluwasan sa mga estudyante ug magtutudlo sa 45,974 ka publiko ug pribadong eskwelahan taliwala sa pag-abli sa klase.
Ang SY 2025-2026 molungtad gikan Hunyo 16 hangtod Marso 31, 2026, nga naglangkob sa 197 ka class days lakip na ang end-of-school-year rites. / TPM / SunStar Philippines