Usa ka 28 anyos nga lalaki nalandig sa tambalanan human naunay sa pagbuto sa iyang armas sa Barangay Arpili, lungsod sa Balamban, ala 1:00 sa kaadlawon, Dominggo, Marso 3, 2024.
Sa pakisusi sa Superbalita Cebu sa imbestigasyon sa kapulisan sa Balamban ubos sa kamandoan sa ilang hepe nga si Police Lt. Col. Joey Bicoy, nasuta nga ang naigo sa iyang tiyan mao si Arman Bo-oc, 28, ulitawo, way trabaho ug molupyo sa naasoy nga dapit.
Ang tagtungod o pamilya wala motaho sa kapulisan apan ang ospital na mao ang nitaho niini isip kabahin sa ilang standard operating procedure.
Matod pa, alas 3:00 sa kaadlawon sa maong adlaw, ang kawani sa Balamban District Hospital nanawag sa Balamban Police Station bahin sa lalaki nga samdan tungod sa pusil.
Ang kapulisan mohimo pa og dugang imbestigasyon bahin sa hitabo lakip sa pagsuta kon unsang kalibre sa armas ang nakaigo ug duna ba usab kini lisensiya. / DVG