Mamalitay og scrap metal gitu-ohang giurom sulod sa lawak alas 4:00 sa kaadlawon, Huwebes, Mayo 22, 2025, sa Sitio Balud, Caimito Street, Barangay Basak San Nicholas, Dakbayan sa Sugbo.
Si Ronelo Villarosa, 29, minyo, taga Sitio Trozo, Barangay Buluagan, San Carlos City, Negros Occidental nakabsan sa kinabuhi human nga niutong ug wala na nakamata dihang gipukaw sa kauban.
Si Randy Alisoso, hingkod, silingan ug kauban ni Ronelo sa lawak nga nahinabi sa Sunstar Superbalita Cebu, niingon nga alas 10:00 sa gabii, Miyerkules maoy katapusan nilang panag-estorya sa biktima. Nangaon sila og burger nga napalit nila nianang gabii sa ilang pag-uli gikan sa trabaho. Natulog sila samtang ang biktima nanglaba.
Apan pagka alas 4:00 sa kaadlawon, kalit nga niagulo ang biktima. Daling gitabang ni Randy si Villarosa pinaagi sa pagpukaw apan wala na gyud mobuka ang mga mata.
Sa iyang kabalaka nidagan siya paingon sa ubos ug gipahibalo ang ilang mga kauban ug sa iyang pagbalik nawad-an na sa panimuot ang biktima.Ila'ng gituohan nga giurom kini. Lagsik pa kaayo ang panglawas niini, walay sakit, ug wala sab nakainom.
Ang mga sakop sa Mambaling Police Station daling ni-request sa taga Scene of the Crime Operatives (Soco) paghiling sa patay nga lawas aron pagsubay unsay namatyan niini. /GPL / JDG