Nikabat sa 299,737 ka kabus nga senior citizens sa Central Visayas (CV), ang nakabanepisyo sa social pension program sa kagamhanan niadtong 2023 pinaagi sa Department of Social Welfare and Development (DSWD) 7.
Ug dili mominos sa P1.8 bilyunes ang gipagawas aron mabayran ang 100% sa target nga gidaghanon sa mga senior citizen sa rehiyon.
Ang DSWD 7 nag-apud-apod sa kantidad ngadto sa mga benepisyaryo pinaagi sa direktang pagbayad ug pagbalhin sa pundo ngadto sa 80 ka local government units (LGUs), nga maoy nag-facilitate sa pagbayad sa ilang mga konstituwente.
Sa 299,737 ka mga kabus nga senior citizens, ang 127,439 gikan sa Cebu, 99,490 gikan sa Bohol, 62,287 gikan sa Negros Oriental, ug 10,521 gikan sa probinsya sa Siquijor.
Ang DSWD 7 nagpagawas og report niadtong Enero 24, 2024, nga nag-ingon kapin sa 4 ka milyones ka mga kabus nga senior citizens sa nasod ang nakadawat og kinatibuk-ang P6,000 niadtong 2023, diin 7% niini gikan sa CV.
Ang samang report naghisgot nga ang 2024 monthly stipend mosaka gikan sa P500 ngadto sa P1,000 sugod sa Pebrero. Ang Republic Act 11916, o Act Increasing the Social Pension of Indigent Senior Citizens, naghatag og 100 porsiyento nga usbaw sa binuwan nga stipend aron matabangan ang mga benepisyaryo sa padayong pagsaka sa presyo sa nagkadaiyang palaliton.