Sa usa ka makasaysayanon nga kalambuan alang sa abyasyon sa Pilipinas, ang Mactan Cebu International Airport Authority (MCIAA) opisyal na nga gisugdan ang operasyon sa ikaduhang parallel runway sa tugpahanan, nga mao ang sinugdanan sa mas halapad nga kapasidad sa operasyon sa maong airport.
Ang makasaysayanong pagsugod sa operasyon niini nahitabo niadtong Biyernes, Hulyo 18, 2025, pinaagi sa inaugural flights nga migamit na sa gitukod nga 2,560-metros nga parallel runway, matod na usab sa opisyal nga Facebook post sa MCIAA.
Sa eksaktong alas 3:34 sa buntag, ang flight 7C2177 gikan sa Incheon, South Korea nahimong unang eroplano nga mitugpa sa bag-ong runway, gisundan dayon kini sa pagbiya sa flight 5J 5108 paingon sa Kansai, Japan sa alas 3:42 sa buntag.
Si MCIAA General Manager ug CEO Julius Neri, Jr. nagkanayon nga kining labing uwahing kalambuan sa tugpahanan sa Sugbo makapauswag sa kapabilidad sa tugpahanan isip usa sa labing busy ug estratehikong internasyonal nga mga ganghaan sa Pilipinas.
“The opening of the second parallel runway is expected to significantly improve airside capacity, reduce aircraft holding times, and support future growth in passenger and cargo traffic,” matod ni Neri.
Ang ikaduhang runway, nga adunay kompleto nga 237-metros sa gitas-on nga taxiway ug gilapdon nga 23 metros, hingpit nga nagamit pipila lang ka semana bag-o ang ika-35 nga anibersaryo sa pagkatukod sa awtoridad sa airport karong umaabot Hulyo 31.
Si Neri nagkanayon nga ang ikaduhang runway magsilbi nga importanteng backup atol sa temporaryo nga pagsirado sa main runway tungod sa buhaton nga maintenance, aircraft-related nga mga emerhensiya, o wala damha nga mga dagkong panghitabo.
Ang pag-abli usab sa maong runway na-timing kini sa panahon nga ang main runway temporaryo nga gisirhan aron ipaubos sa dinaliang pag-ayo tungod sa usa ka nahuyang nga aspalto kaniadtong Hulyo 12.
Ang emerhensiya nga pag-ayo niini miresulta sa pagkabalda sa operasyon sa MCIA, diin sa kinatibuk-an niabot sa 89 ka mga flight ang nalangan, gibalhin, o nakansela.
Ang pag-ayo sa nag-unang runway sa maong airport gipaabot nga mahuman sulod sa usa ka tuig.
Gikompirmar usab ni Neri kaniadto sa SunStar Cebu nga ang ikaduhang runway sa tugpahanan nagamit na bag-o ang paman ang orihinal nga eskedyul sa pagbukas niini nga adunay clearance gikan sa Department of Transportation (DOTr) ug sa Civil Aviation Airport of the Philippines (CAAP).
Siya miingon nga ang ikaduhang airstrip gamiton aron dili mabalda ang operasyon sa tugpahanan, mapanalipdan ang kaluwasan sa mga pasahero ug mga iskedyul sa mga flight.
Niadtong Enero 30, opisyal nga giinagurahan ni Presidente Ferdinand “Bongbong” Marcos Jr. uban sa mga stakeholder sa airport ang P2.07 bilyunes nga parallel runway sa MCIA.
Matod ni Marcos nga ang pagpalambo sa runway kabahin sa mas lapad nga nasudnong pagpalambo sa mga imprastraktura ubos sa Aviation Infrastructure Program sa gobyerno.
Ang MCIA mao ang unang airport sa Pilipinas nga nag-operate og parallel runway system.
Mao usab kini ang usa sa mga tugpahanan sa nasod nga adunay labing daghang flights dili lang sa domestic o sa mga isla sa nasod, lakip na ang international. / DPC