Tulo ka mga sugarol nasikop sa mga sakop sa City Mobile Force Company sa Cebu City Police Office atol sa gilusad nga Oplan Hipos alas 2:05 sa kaadlawon sa Biyernes Mayo 24, 2024 sa Sitio Ermita Proper, Brgy. Ermita, Dakbayan sa Sugbo ubos sa supervision sa hepe niini nga si Police Lieutenant Colonel Joy Leanza.
Ang mga suspek nga naatlan nga naghantak sa nag-roving nga mga polis mao sila si Cyde Cabinte Balais, 29; Joselito Justo Cabigon, 31, taga Sitio Bato Carbon; ug Pablito Jamora Aparri Jr., 34, taga Sitio Eagle, T. Padilla Street, Barangay T. Padilla, Dakbayan sa Sugbo.
Nasakmit sa mga polis ang tulo ka mga sinsiyo nga gihimong antugon ug usa ka snub nose nga kalibre .38 nga revolver nga way serial number ug duha ka mga bala niini nga nakuha sa posisyon ni Aparri.
Matod ni Police Lt. Col. Janette Rafter, deputy city director for administration sa CCPO, ang Oplan Hipos maoy anti-criminality campaign sa kapulisan sa dakbayan.
Niini, dunay mga polis nga mo-roving sa sudlonong bahin sa kabarangayan aron mopatuman sa tanang ordinansa sa siyudad. Kini sama sa illegal gambling, mag-inom sa kilid sa karsada panahon sa lawom na nga gabii ug uban pa.
Nakita nila nga epektibo ang maong kampanya tungod kay kadtong mag-estambay sa gawas bisan naa na sa kaadlawon mabadlong ug papaulion.
Ang maong kampanya nalakip na sa police visibility uban sa pakig-alayon sa mga barangay tanod aron magpabilin nga malinawon ug hapsay ang matag barangay.
Samtang nimando si Rafter sa mga polis nga nakasakmit sa armas ni Aparri nga ipaubos kini sa ballistic examination aron masuta kon wala ba kini gigamit sa krimen. / AYB