Tulo ka mga tawo nangalandig sa tambalanan sa dihang usa ka motorsiklo nadasmagan sa lain nga motorsiklo sa national highway sa Barangay Poblacion 2, lungsod sa Malabuyoc, alas 11 sa buntag sa Miyerkules, Disyembre 20, 2023.
Ang nangaangol mga managsuon nga sila si Jellow Fuentes,18 , dalaga, kinsa nagmaneho sa motorsiklo ug ang 16 anyos nga dalagang manghod, taga Sityo Mongoso, Barangay MontaƱeza, Malabuyoc.
Laing angol mao ang nagmaneho sa laing motorsiklo mao si Imelda Labella, 47, taga dalan Urgello, Barangay Sambag 1, dakbayan sa Sugbo.
Sa imbestigasyon sa kapulisan sa Mabuyoc ubos sa kamandoan ni Police Capt. Arja Pelayo Gronciano, nasayran sa Superbalita Cebu nga si Labella nagmaneho sa motorsiklo gikan sa Siyudad sa Sugbo paingon sa sentro sa Malabuyoc.
Nagsunod siya sa motorsiklo nga gimaniho ni Fuentes.
Giingon nga kalit nga niliko sa tuo si Fuentes hinungdan nga nadasmagan ni Labella nga niresulta sa ilang pagkatumba ug pagkaangol sa tulo ka mga sakay sa motorsiklo.
Pulos sila gipangdala sa tambalanan sa mga sakop sa Malabuyoc Municipal Disaster Risk Reduction Management Office.
Atol ning pagsuwat, pulos na sila luwas.