Naluwas sa mga sakop sa Women and Children Protection Center (WCPC)-Visayas Field Unit, ubos sa pakig-alayon sa Department of Social Welfare and Development (DSWD 7), ang upat sa mga menor de edad nga biktima gikan sa 33 anyos nga suspek nga giingong nalambigit sa child pornography.
Ang WCPC nitunol sa search warrant batok sa suspek sa iyang balay sa usa sa mga barangay sa Dakbayan sa Naga, niadtong alas 11 sa buntag, Huwebes, Mayo 29, 2025.
Ang mga babaye’ng biktima nga nagpangidaron og 15, 14 ug 6 anyos, mga anak sa suspek samtang ang ika-upat nga biktima nga 15 anyos nga lalaki pag-umangkon sab sa maong dinakpan.
Ang WCPC mi-implementar sa Warrant to Search, Seize, and Examine Computer Data (WSSECD) ug rescue operation nga giluwatan ni Judge Benison Mahawan sa Regional Trial Court 7, Branch 65, Dakbayan sa Talisay batok sa subject sa warrant sa kalapasan sa Republic Act 11930 kon Anti-Online Sexual Abuse or Exploitation of Children (OSAEC) ug Anti-Child Sexual Abuse or Exploitation Materials (CSAEM) Act.
Uban sa WCPC ang Forensic Examiner sa Regional Anti-Cybercrime Unit 7, Department of Justice, International Justice Mission (IJM) ug DSWD.
Nakuha sa mga operatiba ang lima ka cellphones nga maoy gigamit sa suspek sa pagkuha og video sa law-ay nga binuhatan sa suspek ngadto sa mga biktima.
Sa inisyal nga pakighinabi ngadto sa suspek, hugtanon niyang gipanghimakak nga iyang gipahubo ang mga bata.
Nasayran nga wa masayod ang suspek nga usa diay ka online undercover operative ang iyang gika-chat ug gika-video call.
Ang maong operatiba nakakuha og igong ebidensiya nga magtumbok sa suspek sa iyang binuhatan ngadto sa mga bata bugti sa bayad.
Makadaghan nang higayon nga nakadawat og bayad ang suspek gikan sa cybersex, base sa mga resibo gikan remittance center, sukwahi sa pangankon nga tag P500 ray iyang kita para lang ikapa-load sa iyang cellphone.
Aduna say lig-on nga ebidensiya ang kapulisan sa dihang screen shot nga kuha gikan sa undercover operative nga nagpamatuod nga gipahimo og law-ay ang mga biktima diha online.
Kasamtangan nga anaa sa kustodiya sa DSWD ang mga biktima samtang gitanggong sa bilanggoan ang suspek. / AYB