Tulo ka mga balay nangasunog, duha niini nangaugdaw, sa Biyernes sa alas 3:45 sa hapon sa sityo Pilit, Brgy. Cabancalan, dakbayan sa Mandaue.
Matod ni SF02 Leo Andicoy, imbestigador sa kabomberohan sa siyudad sa Mandaue sa interbyo sa Superbalita Cebu, nga alas 3:45 ilang nadawat ang unang alarma.
Mga 30 minutos ang nakalabay, nakontrolar ang kayo ug hingpit nga napawong sa alas 4:19 sa hapon.
Si Andicoy niingon nga nagsugod ang kayo sa kwarto sa balay ni Maxima Inot, 80, nga giabangan sa usa ka Jomar.
Gawas sa balay ni Inot nga naugdaw, hingpit sab nga nasunog ang kang Juliete Inot. Nakan-an ang balay ni Edelina Cabrella.
Way naangol sa sunog nga nagbilin og P90,000 nga gibana-banang danyos.
