3 ka balay naugdaw sa sunog sa Lapu Lapu City

3 ka balay naugdaw sa sunog sa Lapu Lapu City
SUNOG: Gipaneguro sa mga bombero sa Dakbayan sa Lapu-Lapu nga hingpit nga napawong ang sunog nga niigo sa Brgy. Basak nga nisunog sa upat ka balay, tulo niini naugdaw. / LAPU LAPU CITY PIO

Upat ka mga balay ang nangasunog, tulo niini nangaugdaw, sa alas 9:27 sa buntag sa Sabado, Hulyo 6, 2024 sa Sityo San Roque, Upper Kagudoy (Back of Indiana), Brgy. Basak, Siyudad sa Lapu-Lapu.

Ang sunog nagsugod sa balay ni Denia Padillo, butyag ni F03 Jeffrey Gerodiaz, imbestigador sa Lapu-Lapu City Fire District sa Lapu-Lapu City nga gikahinabi sa Superbalita Cebu pinaagi sa telepuno.

Matod ni Gerodiaz nga giisa sa first alarm alas 9:33 sa buntag ang sunog ug hingpit nga napawong alas 9:54 sa buntag.

Kini nagbilin og gibana-banang P180, 000 nga danyos nga nakaapekto sa upat ka mga pamilya nga gilangkuban sa 12 ka mga individual.

Ila pang gisusi ang hinungdan sa sunog.

Si Lapu-Lapu City Mayor Junard “Ahong” Chan nimando gilayon sa paghatag og abag sa mga nasunogan.

“Sa labing daling panahon, atong ihatod ang atong hinabang para sa mga apektadong pamilya ug ipahimutang sila sa saktong lugar nga makapahuway sila og tarong. Pasalamat gihapon ta sa Ginoo nga wala ray naangol o nakalas nga kinabuhi sa maong insidente,” matod sa mayor sa iyang Facebook post. / DVG, REV

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph