Tulo samaran, duha niini menor, nga sakop sa grupo nga Crips human gipangdunggab sa grupo sa Bloods, alas 2:20 sa kaadlawon, Dominggo, Disyembre 8, 2024 sa gawas sa covered court sa Brgy. Tambongon, lungsod sa San Remigio.
Si 'Makmak', 15, taga Banawa, Brgy. Guadalupe, siyudad sa Sugbo ug sakop sa Crips, samdan sa nagkadaiyang bahin sa lawas.
Samtang si 'Carlo', 15, nagpuyo sa nahisgutang lugar, nasamdan sab sa nagkadaiyang bahin sa lawas.
Usa ka Raymond Mondejar, 20, taga Brgy. Dapdap, San Remigio, ang naangol sab.
Samtang, nitahan si Reymart Calambro Bantoc, 22, taga Purok Sambag, Brgy. Lambusan, San Remigio aron paglimpiyo sa kaugalingon.
Si P/Staff Sgt. Jeffrey Lequin, imbestigador sa San Remigio Police Station nga nahinabi sa Superbalita Cebu, niingon nga desperas sa piyesta sa barangay.
Diha sa gawas sa diskuhan nahitabo ang karambola.
Ang habig sa mga biktima nangangkon nga gidunggab sila, gipauwanan og botelya ug mga bato.
Tungod niini, dason sa mga biktima, nidepensa sila ug mibawos sa pikas grupo.
Matod ni Lequin, walay makatumbok sa matag habig kinsa gyud ang nanunggab ug si kinsay nagdalag mahait nga hinagiban.
Ang habig sa mga samaran igo lang midepensa.
Ang sa pikas, sila sab giunhan sa mga biktima.
Pulos niangkon nga duna silay grupo ug duna sab silay kaubang mga Crips atol sa karambola.
Matod ni Lequin, sa ilang nakuhang impormasyon gikan sa mga barangay opisyal, dugay nang nangkabangi ang matag habig sa grupo.
Giingong kon ang grupo sa mga biktima ning-adto sa pikas barangay, birahan sa pikas grupo.
Kon ang pikas grupo sab maoy maabot sa ilang barangay, ilaha sab nga birahan.
Gibutyag niini nga si Bantoc, gipatahan sa iyaan aron paglimpiyo sa iyang kaugalingon ug nangangkon nga silay giunhan.
Gitudlo niini si Mondejar, maoy unang nang-ataki kanila.
Ang Crips ug Bloods grupo nga sagad giapilan sa mga batan-on ug gikataho nga malambigit og duguong engkwentro sama sa nahitabo sa San Remigio. / GPL