TULO ka mga durogista ang nangabalhug sa Inayawan Police Station, samtang P1.7 milyones nga balor sa ilegal nga drogas ang nasakmit sa managlahi nga buy bust operation sa Biyernes sa kaadlawon, Hunyo 27, 2025.
Labing uwahi nga nadakpan ang high value individual sa alas 4:55 sa buntag sa Sitio Middle Tabucanal, Barangay Poblacion Pardo sa dakbayan sa Sugbo.
Ang nasikop giila nga si Romil Cordova Lim alyas Omi, nga nagpuyo ra usab sa maong lugar.
Nakuha gikan kaniya ang mga pinutos sa gituohang shabu nga motimbang sa 225 gramos nga dunay standard drug price nga P1,530,000.
Matud sa usa sa mga sakop sa Drug Enforcement Team sa Inayawan Police Station nga si Lim nadakpan na niadtong Oktobre 2020 sa kaso gihapon sa ilegal nga drugas.
Lakip sa nadakpan ang duha ka street level individual sa Sitio Upper Tabucanal, Barangay Poblacion Pardo sa alas 3:50 sa buntag.
Ang mga nadakpan mao silang Cheryl Angcon ug Roger Bariquit, pulos hingkod ang pangedaron.
Nasakmit gikan kanila ang mga putos sa gituohang shabu nga mokantidad sa P70,448.
Ang Inayawan Police Station milusad sa duha ka buy bust operation sa pagpangulo sa hepe niini nga si Police Major Kenneth Paul Albotra subay sa pagpatuman sa Simultaneous Anti-Criminality and Law Enforcement Operation (Sacleo) sa Cebu City Police Office.
Ang mga suspetsado gikatakdang pasakaan og kasong kalapasan sa Section 5 ug 11, Article II Republic Act 9165 ngadto sa korte. / AYB