Balhog sa temporary custodial facility sa Consolacion Police Station ang tulo ka lalaki human ma-buy-bust sa kapulisan alas 10:30 sa gabii, Huwebes, Hunyo 5, 2025 sa Barangay Garing sa Lungsod sa Consolacion.
Ang mga dinakpan giila nga sila si Lito, 36, usa ka mekaniko nga maoy target sa operation nga nagpuyo ra usab sa maong barangay ug ang iyang mga konsabo nga silang Chris, 45, taga Barangay Nangka ug Gerry, 29, taga Barangay Tugbongan, Lungsod sa Consolacion, Probinsya sa Sugbo.
Nakuha gikan kanila ang mga pinakete sa gituohang shabu nga motimbang og 200 gramos nga dunay standard drug price nga P1.3 million.
Matod ni Police Lieutenant Colonel Eunil Avergonzado ang hepe sa Consolacion Police Station nga samtang nagtrabaho isip mekaniko si Oliveros nag-sideline usab siya isip drug courier bugti sa dakong kwarta nga suhol.
Nakadawat og report ang kapulisan nga nalambigit ang maong suspek sa ilegal nga drugas ug ang iyang supply nga moabot giingong dinagko nga maoy hinungdan nga ila kining gipaubos sa surveillance sulod sa pila ka semana.
Human makuha ang impormasyon gika-transact sa kapulisan ang suspek ug malampuson kiing nadakpan pinasikad sa buy-bust.
Kalapasan sa Section 5 ug 11, Article II, Republic Act 9165 ang gipasaka nga kaso sa kapulisan sa Consolacion batok sa mga suspek. / AYB