3 ka establisemento sa CV exempted sa wage increase

3 ka establisemento sa CV exempted sa wage increase

Tulo sa lima ka mga establisemento sa negosyo sa Central Visayas (CV) nga nangayo og exemption alang sa pagpatuman sa Wage Order No. ROVII-24 o ang P33 nga usbaw sa minimum nga suweldo sa rehiyon, gitugotan.

Giaprubahan kini sa Regional Tripartite Wages and Productivity Board (RTWPB-7) atol sa ilang unang board meeting sa tuig niadtong Enero 4, 2024.

Mao kini ang Big Brain Food Hub ug YuChin Milktea sa Cebu City, samtang sa Dumaguete, ang aplikasyon sa Seafront Hotel giaprubahan sa kondisyon nga ipailalom sa dugang nga pagsusi.

Gihatagan ang hotel og 15 ka adlaw gikan sa pagkadawat sa order nga mosumiter og proof of correction human ang labor inspector dunay findings sa wala pagbayad sa holiday pay.

Ang pagkapakyas sa pagtuman naglangkob sa awtomatik nga pagbawi sa exemption.

Kini nga mga establisemento nga adunay giaprubahan nga mga aplikasyon, dili iapil sa pagtuman sa wage order sulod sa usa ka tuig gikan sa pagka-epektibo sa wage order.

Kahinumduman, gianunsyo sa RTWPB 7 niadtong Septiyembre 5, 2023 ang P33 nga usbaw sa inadlaw nga minimum nga suholan nga epektibo niadtong Oktubre 1, 2023.

Sa pag-usbaw, ang minimum nga sweldo sa rehiyon gikan sa P420 ngadto sa P468 alang sa non-agriculture, depende sa geograpikanhong mga dapit ug klase.

Human sa Nob. 29, 2023, ang katapusang adlaw sa pag-file sa aplikasyon alang sa exemption, nadawat sa RTWPB 7 ang aplikasyon sa Come and Wash Laundry Shop sa Cebu City, EFM Staffing General Services sa Mandaue City, Big Brain Food Hub sa Cebu City, YuChin Milktea sa Cebu City, ug Dumaguete Seafront Hotel sa Dumaguete City.

Ang aplikasyon sa Wash Laundry Shop ug EFM Staffing General Services gibalibaran atol sa katapusang board meeting niadtong 2023, tungod sa wala pagsunod sa mga aplikante sa miaging wage order ug ang gikinahanglan nga adunay manpower nga ubos sa 10 ka mga empleyado.

Sa gibalibaran nga aplikasyon, ang duha ka mga establisemento gimanduan sa pagbayad sa ilang mga trabahante sa usbaw sa suholan gikan sa petsa sa wage order, dugang nga usa ka porsyento matag buwan nga retroactive ngadto sa pagka-epektibo sa wage order.

Ang mga rason alang sa exemption naglakip nga ang establisemento adunay ubos sa napulo ka mga empleyado o kini naapektuhan sa bisan unsang natural nga kalamidad o katalagman nga mugna sa tawo.

Atol sa miaging tigom, diha ang tanang mga sakop sa RTWPB 7 nga gipangulohan ni Chairperson Lilia Estillore uban nila ni Vice Chairpersons Maria Elena Arbon ug Jennifer Bretaña, Management Sector Representative Dr. Philip Tan, ug Labor Sector Representatives Atty. Nora Analyn Demeterio- Diego ug G. Antonio Cuizon.

Related Stories

No stories found.
SunStar Publishing Inc.
www.sunstar.com.ph