Nipili og pangulo sa Association of Barangay Councils (ABC) ang tulo ka highly urbanized nga mga dakbayan: dakbayan sa Sugbo, Lapu-Lapu, ug Mandaue, atol sa gipahigayon nga ABC elections sa Biyernes, Disyembre 15, 2023.
Sa dakbayan sa Sugbo, si Franklyn Ong napili pag-usab isip ABC president, nga nakakuha og 76 ka botos batok kang Calamba Barangay Captain Ester Concha nga nakakuha og duha ka botos.
Si Ong napili pag-usab isip barangay kapitan sa Kasambagan niadtong Oktubre 30 nga piniliay. 13 ka tuig na siya sa serbisyo publiko.
Una siyang napili isip presidente sa ABC niadtong 2018.
Si Ong nagsugod sa iyang karera sa politika niadtong 2010 isip konsehal sa barangay. Sa samang tuig, napili siya isip presidente sa Barangay Councils League of the Philippines (BCLP) Cebu City Chapter. Napili siya isip nasudnong bise presidente sa Kabisay-an sa misunod nga tuig.
Niadtong 2012, napili’ng BCLP national president si Ong ug mipuli sa katungdanan nga nabakante ni Barangay Moonwalk, Parañaque City councilman Julio Jaime, kinsa gipasanginlan nga nagpadagan og scam.
Niadtong 2013, napili siya pag-usab isip unang konsehal sa barangay, ug niadtong 2016, tungod sa pagkamatay sa barangay kapitan niadto, siya niasumer isip pangulo sa barangay pinaagi sa balaod sa succession.
Napili siya isip barangay kapitan niadtong 2018, diin sa ulahi napili siya isip presidente sa ABC.
Si Ong, sa wala pa ang ABC polls, nakakuha sa suporta ni kanhi mayor Tomas Osmeña ug Mayor Michael Rama.
Nailhan si Ong nga kaalyado sa Bando Osmeña Pundok Kauswagan (BOPK), ang partido politikal nga gidumala ni Osmeña.
Giproklamar usab sa ABC Cebu City chapter si Kalunasan Barangay Captain Carlitos Ceniza isip bise presidente sa asosasyon. Nidagan siya nga walay kontra.
Si San Antonio Barangay Captain Daido Stephen Abcede Jr. napili usab isip auditor nga nakakuha og 55 ka botos. Nidaog siya batok ni Ermita Barangay Captain Mark Rizaldy Miral nga nakakuha og 18 ka botos.
Ang bag-ong board of directors sa asosasyon mao sila si Kalubihan Barangay Captain Rex Milan (adunay 70 boto), Pardo Barangay Captain Danilo Lim (67 boto), Buhisan Barangay Captain Gremar Barete (66 boto), Cambinocot Barangay Captain Reynald Lauron (66 botos), Kinasang-an Barangay Captain Susan Enriquez (60 votes), Guadalupe Barangay Captain Apol Ross Enriquez (64 votes), Budlaan Barangay Captain Nerissa Antolihao (63 votes), ug Pit-os Barangay Captain Nilo Tariman (60 votes).
Sila si Sambag 1 Barangay Captain Aileen Guardo ug Buot-Taop Barangay Captain Rosalita Callino, kinsa midagan usab alang sa BOD membership, nakakuha lang og 21 ug 17 ka botos, matag usa.
LAPU-LAPU
Napili isip ABC president si Basak Barangay Captain Jasmine Chan, anak ni Lapu-Lapu City Mayor Junard “Ahong” Chan. Nakakuha siya og 29 ka botos gikan sa 30 ka mga barangay kapitan sa dakbayan.
Si Canjulao Barangay Kapitan Rufo Bering napili isip bise presidente; Arsilito Pejo sa Calawisan ang auditor, ug Milagros Amores sa Marigondon, Rosita Macasaol sa Ibo, Efren Aying sa Mactan, Ruben Patigdas sa Subabasbas, Ranulfo Emperio sa Pusok, Francisco Gilig Jr. sa Sta. Rosa, Audie Flores sa Tingo, ug Eulogio Cesar Manayon sa Babag isip board members.
Ang Lapu-Lapu ABC elections gipahigayon sa Goldberry Suites & Hotel sa Mactan niadtong Biyernes
MANDAUE
Si Canduman Barangay Captain Dante Borbajo maoy bag-ong ABC president sa Mandaue City.
Nakadawat og unanimous votes si Borbajo gikan sa iyang 26 ka mga kaubang barangay kapitan atol sa ABC elections sa session hall sa Mandaue City Hall.
Siya maoy mohulip sa kanhi ABC president ug karon konsehal sa Barangay Subangdaku Ernie Manatad.
Molingkod siya isip ex-officio member sa City Council sa higayon nga maaprobahan na sa National ABC.
Karong tuiga maoy iyang ikaduhang termino isip punong barangay sa Canduman sukad niadtong 2018 human siya midaog sa Barangay and Sangguniang Kabataan Elections (BSKE) nga nidagan ubos sa pulitikanhong alyansa ni Mandaue Mayor Jonas Cortes niadtong Oktubre 30.
Si Borbajo nagsilbi usab nga konsehal sa barangay niadtong 2010 hangtod 2018.
Sa pakighinabi sa mga tigbalita niadtong Biyernes, si Borbajo niingon nga nalipay siya sa iyang pagkapili isip ABC president ug nipasalig nga siya ang mamahimo’ng paagi aron ang City Council makadungog sa mga kabalaka ug opinyon sa matag barangay.
Nangampanya usab siya alang sa panaghiusa sulod sa matag barangay.
Si Borbajo miingon nga iyang unahon ang pagpangita og balaod alang sa desente nga serbisyo sa paglubong ug mga inisyatibo sa pagkonserbar sa kinaiyahan sa iyang termino.
Napili uban niya sila si Barangay Kapitan Ignacio Cortes II sa Centro isip bise presidente sa ABC ug Roy Lumapas sa Bakilid isip auditor.