Nagkaalegre ang sitwasyon sa Metropolitan Cebu Water District (MCWD) tungod sa pagtumaw karon sa tulo ka mga grupo sa Hunta tungod sa pag-interbiner sa Local Water Utilities Administration (LWUA).
Kini human si LWUA Administrator Jose Moises Salonga nipahibalo sa ‘partial intervention’ sa MCWD, nga matod niya gitugotan sa Resolution 35, s. 2023, ug giaprubahan sa LWUA Board of Trustees subay sa Presidential Decree 198, as amended.
Si Salonga nitudlo og bag-ong chairman sa Board ug ubang mga sakop niini. Subay sa iyang suwat, sila ni-takeover sa MCWD board sugod niadtong Biyernes, Marso 15, ug giingong molungtad sulod sa unom ka buwan. Apan si MCWD general manager Edgar Donoso niingon nga sila magpaabot sa komentaryo sa Office of the Government Corporate Counsel (OGCC) sa ilang pagkonsulta bahin sa interbensiyon sa LWUA.
Ug samtang wala pay tubag ang OGCC, ang Hunta nga gipangulohan ni Atty. Joey Daluz III maoy iyang giila ni Donoso sa pagpadayon sa ilang serbisyo. Kahinumdoman, si Daluz uban sa laing duha ka mga sakop sa Hunta nga sila si Miguelito Pato ug Jodelyn May Seno gipangtaktak ni Mayor Michael Rama sa Agusto sa miaging tuig apan wa mokanaug sa pwesto ug nihagit niini sa korte.
Nasayran nga si Rama nitudlo kang retired Gen. Melquiades Feliciano isip bag-ong chairman sa Board hulip kang Daluz ug laing duha ka mga sakop sa Hunta nga sila si Atty. Aristotle Batuhan ug Nelson Yuvallos.
Mao kini karon, tulo ka grupo ang Hunta sa MCWD. Matod pa, ‘only in Cebu.’ Kinsa gyud ang sakto? Hinuon, ang kampo ni Daluz III maoy nakapabor, gawas nga nagkalingkod daan sa pwesto, siya usab ang giila sa MCWD general manager sa pagkakaron.
Kini ang sitwasyon sa MCWD tayming ning panahon nga dakong hagit ang supply sa tubig tungod kay ting-init na usab ug dunay El Niño phenomenon. Maayong magkahiusa sa pagpangita og solusyon sa nag-ung-ong nga dakong krisis sa tubig.