Tulo ka mga Indian national nga mga tinun-an sa Medisina sa University of the Visayas (UV) Banilad campus, ang naangol sa pagkahulog sa ilang gisakyan nga awto sa pangpang sa Sityo Tingbaon, Brgy. Ablayan, lungsod sa Dalaguete, alas 10:30 sa buntag, Dominggo, Abril 21, 2024.
Apan nasayran sa kapulisan nga naluwas ang tulo sa alas 3:59 na sa hapon sa samang adlaw tungod sa kaawaaw sa dapit.
Maayong pagkagusbat sa Toyota Vios Sedan apan suwerte nga gamay lang ang kadaot sa lawas sa tulo ka Indiano ug wala na kini na-admit sa ospital.
Samtang nihangyo ang tulo nga nagpangidaron og 23, 21 ug 24 anyos nga dili kini magpahingalan sa taho.
Base sa imbestigasyon ni P/Maser Sgt. Jeffrey Simaringa ubos sa kamanduan sa ilang hepe nga si P/Maj. Clemente Ceralde Jr., ang mga biktima gikan nanuroy sa lungsod sa Moalboal ug nagbiyahe padulong sa Osmeña Peak sa Dalaguete.
Apan nibuto ang unahan nga ligid dapit sa driver's side hinungdan nga nawad-an og kontrol sa sakyanan ang 23 anyos nga Indiano nga nagmaneho sa awto ug nahulog kini sa pangpang sa naasoy nga dapit. / DVG