Tulo ka mga kaso sa pagpamusil nahitabo sa Dakbayan sa Sugbo sa Biyernes, Agusto 2, 2024, duha ang nangakalas samtang usa ang naa sa tambalanan.
Unang pagpamusil nahitabo sa Sitio Daclan, Barangay Tejero, Dakbayan sa Sugbo, alas 2:30 sa kaadlawon.
Ang biktima nga namatay diha-diha giila nga si Ramie Jimm Villaruz, alyas Longlong, 37, dunay kaipon, residente sa Sitio Back Blessed Sacrament, Brgy. Tejero.
Sa imbestigasyon sa Waterfront Police Station ubos sa pagdumala ni Police Major John Lynbert Yango nasayran nga sa wala pa ang pagpamusil nakalalis sa biktima ang suspek nga si alyas John Paul.
Pipila ka mga gutlo ang milabay, sipang buto sa armas ang nadungog sa mga residente ug nagbuy-od na ang biktima samtang ang suspek dali nga nisibat.
Ang mga sakop sa Scene of the Crime Operation (Soco) nakakuha’g upat ka basiyo sa bala sa kalibre 45 sa dapit, lakip na ang cellphone sa biktima nga naa sa bulsa niini.
Matod ni Police Lieutenant Colonel Janette Rafter, deputy city director for administration sa Cebu City Police Office, nga love triangle ang motibo sa krimen sanglit ang suspek nga si alyas John Paul giingong nakigrelasyon sa kaipon sa biktima nga maoy hinungdan sa ilang panag- away.
Gibutyag ni Rafter nga ang biktima nadakpan na kaniadto sa kaso sa illegal gambling ug giingong nalambigit usab sa ilegal nga drugas samtang ang suspek nadakpan na usab sa kaso sa ilegal nga drugas ug niadtong miaging tuig lang nakagawas sa Cebu City Jail.
Si alyas John Paul gipasakaan na usab og kaso sa Waterfront Police Station duha ka mga buwan na ang nakalabay human magpabuto og armas diin naigo ang iyang kaipon.
IKADUHANG KASO
Samtang gialarma usab sa Mambaling Police Station ang usa ka pagpamusil patay sa Sitio Naba, Barangay Mambaling pasado alas 4 sa kaadlawon.
Ang biktima giila nga si Victor Agillon, 67, nagpuyo ra usab sa maong lugar.
Matod sa igsuon sa biktima nga dunay duha ka wala mailhing mga lalaki ang nanuktok sa balay sa biktima ug nanawag sa iyang ngalan kay mopalit og ilegal nga drugas.
Apan sa dihang gibalibaran nga wala na siya mamaligya nanglakaw ang duha apan pipila ka segundo mibalik ni ug gisulod ang balay niini ug dayon gipusil tumong sa lawas ug ulo niini.
Giangkon sa igsuon sa biktima nga igo lang sugoon sa pagpalit og ilegal nga drugas sa mga drug user sa dapit apan ila na kining gibadlong nga moundang na tungod kay daghang polis nga mag- roving sa ilang dapit.
Ang mga polis sa Mambaling nagpadayon pa usab sa ilang imbestigasyon ug pag ila sa mga suspek.
IKATULONG KASO
Pagka alas 11:58 sa udto laing pagpamusil ang nahitabo sa Sitio All Season 2, Barangay Cogon Pardo.
Ang biktima giila sa iyang mga silingan nga si Mark Anthony Del Socorro Caballero, 22, residente ra usab sa maong lugar.
Sigun sa mga silingan sa biktima nga dunay duha ka mga lalaki nga ning-adto sa balay niini ug nangita sa igsuon niini nga si Rolando apan usa sa mga suspek ang ningbunot og armas ug dayong tion dungan sa bahad nga iya ning pusilon.
Apan giilog sa biktima ang armas nga gition kaniya nga maoy hinungdan nga naglayog sila niini samtang ang kaubang suspek mibunal sa armas sa ulo sa biktima.
Gibuhian sa biktima ang armas ug nidagan kini apan ang usa sa mga suspek ang nipusil sa biktima ug dayong sibat.
Dali nga gidala ang biktima sa Cebu City Medical Center aron magpaalim sa iyang samad, samtang nailhan lang sa mga alyas sa mga suspek nga silang John ug Liam nga gipangita na sa Inayawan Police Station. / AYB