Usa ka Korean national ang napatay ug laing duha ang nasikop sa kapulisan nga nitubag sa alarma sa pagtulis sa usa ka negosyanteng Koryana sa Maria Luisa Subdivision, dakbayan sa Sugbo, alas 9:30 sa gabii, Martes, Abril 2, 2024.
Ang nakalas human nisukol sa kapulisan mao si Sun Yong Choi, 47, taga South Korea ug ang duha nga nabalhog sa Mabolo Police Station mao silang Yong Hee Kim, 45, ug Jun Hee Kim, 49, giingong nagpuyo sa usa ka hotel sa Barangay Mabolo.
Matod ni Police Major Romeo Caacoy Jr., gisulod sa tulo ka mga suspek ang balay sa 43 anyos nga negosyante diin uban niini ang duha niya ka katabang nga pulos Filipina ug gitulis kini gamit ang duha ka mga pistola.
Apan dunay nakabantay sa maong krimen nga maoy hinungdan nga nanawag sila og polis ug nipahibawo nga dunay mga armado nga nisulod sa usa ka balay sa maong subdivision.
Dali nga niresponde ang mga polis sa Mabolo uban sa mga personnel sa Regional Intelligence Unit (RIU) 7 ug giawhag pa ang mga suspetsado nga motahan.
Inay nga motahan, namusil naman hinuon ni nga niresulta sa pagkaangol sa usa ka polis nga dunay ranggo nga Police Staff Sergeant.
Nibawos ang mga polis nga maoy nakaigo sa usa sa mga suspetsado nga nisangpot sa kamatayon ni Choi.
“Nakadawat mig tawag gikan sa subdivision nga naay armed persons mao to nga miresponde ang atong kapulisan, ang atong unit sa SWAT, atoang personnel sa RID 7 ug sa atong CIU..” matod ni Caacoy.
Daling gidala ang polis sa labing duol nga tambalanan ug giingong naa pa kini sa talandugon nga kahimtang tungod sa daghang pinusilan niini sa lawas. Nakuha pagbalik sa mga pulis ang kwarta nga moabot sa P200,000, tulo ka armas ug duha ka relo ug alahas nga mokantidad ang tanan sa P25 milyunes.
Dugang ni Caacoy nga mihimo pa sila karon sa ilang background investigation sa mga suspetsado ug subayon kon kanus-a kini naabot sa siyudad sa Sugbo.
Nibisita sa police station ang wala magpailang opisyal sa Korean consul nga giingong nagpakisayod sa dagan sa imbestigasyon sa kapulisan.
Wala usab sila motubag sa mga pangutana sa mga sakop sa media labot sa nahitabo sa ilang citizen.
“Ato pa giimbestigahan kon unsa gyud ilang business diri sa atoa either nag business sila ug nanarbaho ba, basta ongoing ang atong investigation, Sir,” dugang ni Caacoy.
Wala na moluwat og pamahayag ang mga suspetsado samtang giandam na ang kasong robbery ug frustrated homicide nga ipasaka sa Mabolo Police Station batok sa duha ka mga suspetsado. / AYB