Nasayran nga usa sa tulo ka lalaki nga nangadakpan sa kapulisan sa Dakbayan sa Sugbo atol sa ilang anti-criminality operation sa Biyernes sa tungang gabii, Marso 21, 2025, sa Barangay Suba, Siyudad sa Danao, maoy dakudako sa Nadera gun-for-hire group, samtang ang nahabiling duha mga miyembro sa kaatbang nga grupo nga Gido gun-for-hire.
Apan ang ilang kauban nga kanhi barangay official sa Danao, nakaeskapo atol sa operasyon.
Sila ang gitumbok nga responsable sa sunodsunod nga pagpamusil-patay sa Siyudad sa Sugbo sa milabay nga buwan ug sa miaging semana.
Ang mga armas nga nasakmit naglangkob sa tulo ka .45 caliber pistol nga dunay unom ka magazine niini nga walay sulod nga bala, usa ka unassembled unit sa KG9 machine pistol nga dunay duha ka magazine ug usa ka unassembled unit sa Black Widow 9mm pistol.
Matod ni Police Colonel Enrico Figueroa, hepe sa Cebu City Police Office, nga ang duha ka gun-for-hire group maoy molikida sa mga drug personality nga dunay dakong utang sa ilang amo nga usa ka drug pusher.
Ang leader sa Nadera group niangkon nga bayran siya sa ilang amo og tag P30 mil ngadto sa P60 mil bugti sa kinabuhi sa ilang target nga dunay dakong utang sa ilegal nga drugas.
Matod niya nga sukad siya nisulod sa grupo, makatulo na siya nakapatay ug ang armas nga gigamit iyang gipalit sa Danao.
Ang mga dinakpan niangkon nga pulos sila miyembro sa Batang Cebu 45 og kanhi nang napriso.
Subay niini, gimanduan sa hepe sa Police Regional Office 7 nga si Police Brigadier General Redrico Maranan ang hepe sa kapulisan sa Danao nga puhagon ang tighimo og ilegal nga armas sa maong siyudad.
Gihatagan niya ang mga sakop sa Danao City Police Station og usa ka bulan nga tagal sa pagdakop sa tighimo og armas sa maong dakbayan.
Matod ni Maranan nga ang maong kanhi elected official usa ka barangay kagawad nga ang negosyo mao ang paghimo sa paltik nga armas.
Gibutyag ni Maranan nga ang kasagaran sa mga armas nga gigamit sa mga kriminal sa Central Visayas gikan sa Danao. / AYB