Nahimong highlight sa graduation ceremony sa 262 ka graduates sa Alternative Learning System (ALS) program sa Canjulao Elementary School, dakbayan sa Lapu-Lapu mao ang tulo ka mga lola nga ningtapos sa high school (HS).
Ang graduation ceremony gipahigayon sa Canjulao Elementary School niadtong Mayo 31, 2024.
Gipasidunggan ni Lapu-Lapu City Mayor Junard ‘Ahong’ Chan nga nagsilbi guest speaker sa okasyon, ang maong tulo ka mga junior high school completer nga sila sa si Gemma Tampus, 53; Erlinda Nuñez, 53; ug Leonita Dejito, 52, pulos minyo ug may mga apo.
Gipahinumdoman sa mayor nga dili babag ang pangidaron aron molampos o mahatagan og katumanan ang usa ka pangandoy.
Sa iyang pakigpulong ngadto sa 262 ka mga ninggraduwar, gidasig sila sa mayor nga dili moundang sa pagkab-ot sa ilang mga damgo ug tinguha tungod kay ang kagamhanan kanunay’ng mosuporta o mopaluyo sa ilang mga tinguha.
Ang maong graduation ceremony nagdala sa tema nga “Kabataang Pilipino Para sa Matatag na Kinabukasan ng Bagong Pilipinas.” / FVQ