Tulo ka local government units (LGUs) sa Probinsiya sa Sugbo nagsugod na sa pagpamaligya sa P20-per-kilo nga bugas ubos sa subsidized rice program sa administrasyong Marcos pipila ka adlaw sa dili pa ang dungan nga pagbaligya sa Capitol grounds sa Dakbayan sa Sugbo.
Ang mga Lungsod sa Santander ug Daanbantayan nagsugod sa pagbaligya sa subsidized rice pinaagi sa Sugbo Merkadong Barato (SMB) program niadtong Lunes, Abril 28, 2025, samtang ang Malabuyoc misunod niini niadtong Martes, Abril 29.
Karong Huwebes, Mayo 1, sugdan na sa Kagamhanan sa Probinsiya sa Sugbo ang simultaneous selling event sa tibuok probinsiya nga manukad sa Capitol grounds.
Si Agriculture Secretary Francisco Tiu Laurel Jr., ug Labor Secretary Bienvenido Laguesma gikatakdang moapil sa paglusad.
Si Gobernador Gwendolyn Garcia nipahibawo sa pagsugod sa subsidized rice selling niadtong Biyernes, Abril 25.
Sa tigom niadtong Biyernes sa Kapitolyo, iyang giawhag ang mga mayor nga sugdan na ang pag-withdraw sa gigahin nga mga sako sa bugas gikan sa bodega sa Kapitolyo alang sa pag-apudapod sa SMB program.
Mokabat sa 11,000 ka sakong bugas gikan sa National Food Authority (NFA) nga tag P20 matag kilo ang gihipos sa bodega sa NFA. Andam na sila sa pag-apudapod niini sa nagkadaiyang LGUs sa tibuok Sugbo.
Ang mga benepisyaryo ug giila nga mga nakadawat gikinahanglan nga mogamit sa Capitol-issued QR-coded cards sa pagpalit og subsidized nga bugas, usa ka lakang batok sa mga potensyal nga hoarders.
Sa Santander, gitakda sa munisipyo ang pagbaligya sa bugas matag barangay hangtod sa Lunes, Mayo 5.
Ang mga benepisyaryo gimanduan sa pagsumiti ug national identification (ID) card o bisan unsang valid ID ngadto sa Municipal Social Welfare and Development Office aron makakuha og QR-coded card.
Niadtong Abril 23, gipahibalo ni Laurel sa Kapitolyo ang pilot implementation sa subsidized rice program alang sa Visayas region.
Kini nunot sa direktiba ni Presidente Ferdinand Marcos human sa closed-door meeting uban sa mga gobernador sa Visayas niadtong adlawa sa samang dapit.
Dugang pa ni Laurel nga mosunod ang pagpatuman sa tibuok nasod sa umaabot nga mga buwan.
Ubos sa programa, ang mga piniling benepisyaryo makapalit og labing taas 20 kilos nga NFA rice matag semana sa tag P20 matag kilo.
Ang DA Food Terminal Inc. sa Department of Agriculture mopalit sa bugas gikan sa bodega sa NFA.
Niadtong Martes, si Laurel ug ubang opisyal nipahigayon og opisyal nga pagtilaw sa sample NFA rice nga ibaligya sa tag P20 matag kilo sa Kabisay-an. (EHP)