Tulo ka managhigala ang napalgang patay sa kasagbutan sa Barangay Pajo, Lungsod aa Daanbantayan, alas 6:00 sa buntag, Lunes, Septiyembre 30, 2024.
Ang nangamatay giila sa kapulisan nga sila si Jose Leo Rodrigo, 37, minyo, walay trabaho, taga Purok Mangga 2, Brgy. Pajo; Randolf Rossel Sericon, 27, ulitawo, taga Upper Bantigue, Brgy. Ajuho, Daanbatayan; ug Rey Bolaños Ressel, 24, ulitawo, taga Brgy. Poblacion, Daanbatayan.
Si Police Staff Sgt. George Chavez Jr. sa Daanbatayan Police Station nga nahinabi sa Superbalita Cebu, niingon nga ang mga biktima pulos nakaangkon og daghang samad o bun-og agi'g binunalan.
Ang mga lawas niini naabot sa kalibunan distansiya matag usa, matod ni Chavez. Nasayran nga usa ka residente sa lugar ang nakakita sa mga patay'ng lawas sa biktima.
Dugang ni Chavez, nga ang mga biktima nag-inom niadtong Dominggo sa gabii sa panimalay ni Rodrigo.
Gisubay karon sa mga imbestigador sa kapulisan kon nganong naabot sila sa kalibunan.
Hinuon, ang kapulisan duna nay person of interest (POI) nga gisubay ug kining maong tawo giingong gikabangi ni Rodrigo, kinsa taudtaod na nga gikabangi niini.
Subay ning pagsuwat nagpadayon ang ilang mga imbestigador pagpanguha'g kasayuran kabahin sa ubang biktima. / GPL