Tulo ka mga menor de edad nga taga Barangay Suba, dakbayan sa Sugbo nga mga tinun-an sa usa ka tunghaan sa dakbayan, “na-rescue” sa mga polis nga nag-roving alas 5:30 sa buntag sa Biyernes, Marso 15, 2024 sa Baywalk sa South Road Properties (SRP) sa Barangay Santo Niño.
Ang tulo gipangkustodiya sa Waterfront Police Station human sila naatlan nilang Police Patrolman Alvan Ian Abarito, Patrolman Jason Elardo ug Patrolman John Kenneth Macaraya, mga sakop sa Tactical Motor Riding Unit (TMRU) sa Cebu City Police Office (CCPO).
Nakuha gikan sa tulo ka mga menor ang mga linikit nga marijuana nga ilang gihimo’ng sigarilyo samtang nag-estambay sa Baywalk.
Matod ni Police Lieutenant Colonel Janette Rafter, deputy city director for operations sa CCPO, nga naagian sila sa mga polis nga nag-roving.
Ilang nakita ang tulo nga dunay gidagkutan nga sigarilyo apan sa ilang pagduol nanimaho kini nga marijuana hinungdan nga ilang gisita.
Wala na mohatag og pamahayag ang maong mga batan-on nga nagpangidaron pa og 17 ug 15 anyos.
Bisan sa ilang pangidaron nga mga menor pa, gipasabot ni Rafter nga mamahimo na sila nga mapasakaan og kaso sa pakig-alayon sa Department of Social Welfare and Services (DSWS) sa dakbayan.
Kon masuta sa evaluation nga duna silay kahiamgo sa ilang gihimo, sila mapasakaan og kaso ubos sa balaod.
Subay sa sunodsunod nga accomplishments nga nahimo sa police beat patrollers, ang hepe sa CCPO nga si Police Colonel Ireneo Dalogdog mohatag og pasidungog kanila.
GIPASIDUNGGAN
Gipasidunggan ni Police Captain Mark Don Alfred Leanza hepe sa Abellana Police Station 2 ang duha ka police beat patroller human nga miuli sa cellular phone sa News Editor sa Superbalita Cebu nga si Rolando Morallo.
Ang duha mao silang Patrolman Elman Manlanat Patrolman Juston Tero, pulos na destino sa Cebu City Mobile Force Company sa Cebu City Police Office.
Napunitan sa duha ka bagitong pulis ang cellphone ni Morallo sa dalan F. Ramos sa Barangay Sta. Cruz samtang nag-roving sila ug ila ning malampuson nga nauli sa tag-iya.
Sulondon nga buhat sa duha ka police nga angayan lang dayegon ug pasidunggan.
Sa miaging semana, sunodsunod usab sa pagsikop ang mga beat patrol sa duha ka mga tulisan nga nagsakay og motorsiklo sa Mabolo ug laing isnatser ang nadakpan sa may Manalili, Dakbayan sa Sugbo. / AYB