3 ka mga mananagat naluwas

NALUWAS: Si Orlando Degamo nga taga Barangay Buagsong sa lungsod sa Cordova napadpad didto na sa lungsod sa Argao diin siya naluwas sa Sabado sa udto. / DARIO V. GIL
NALUWAS: Si Orlando Degamo nga taga Barangay Buagsong sa lungsod sa Cordova napadpad didto na sa lungsod sa Argao diin siya naluwas sa Sabado sa udto. / DARIO V. GIL

Tulo ka mga mananagat napalgan human sa pipila ka adlaw nga naglutaw-lutaw sa kadagatan sa samang rason: ang tubig nisulod sa ilang mga pumpboat hinungdan sa pagkaguba sa mga motor.

Si Mark Stanley Cambarijan, 17-anyos nga lalaki nga taga Barangay Simala, lungsod sa Sibonga, habagatang Sugbo, maoy unang nakit-an mga alas 3:30 sa hapon sa Biyernes, Enero 26, 2024.

Giluwas siya sa search and rescue team gikan sa munisipyo human siya gitaho nga nawala.

Nianang kaadlawon sa Biyernes milakaw siya aron mangisda sa kadagatan taliwa sa Argao ug Bohol.

Si Reneboy Seares, ma­ngingisda nga taga Valleher­moso, Negros Oriental, maoy ikaduhang naluwas human nawala sulod sa duha ka adlaw.

Gidala siya sa bul-og sa tubig hangtod naabot sa Sityo Liki, Barangay Santa Cruz, lungsod sa Ronda, mga alas 8 sa buntag sa Sabado, Enero 27, 2024.

Si Orlando Degamo nga taga Barangay Buagsong sa lungsod sa Cordova, Mactan Island, gitumbok nga ikatulo nga mananagat nga naluwas.

Nangisda si Degamo sa kadagatan sa Cordova niadtong Huwebes, dihang naguba ang iyang pumpboat.

Maong nilutaw siya sa tubig sulod sa duha ka adlaw hangtod nga niabot sa Lawis point sa Barangay Looc, lungsod sa Argao, mga alas 11 sa buntag sa Sabado, Enero 27.

Dagko ang bawod karon sa kadagatan sa Kabisay-an tungod sa Northeast Monsoon.

Nipahimangno ang Philippine Atmospheric Geophysical Astronomical Services Administration (PAGASA) sa kakuyaw sa paglawig sa gagmay nga mga sakyanan sa kadagatan. (DVG, TPT, dugang taho ni REV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph