3 ka mga tulis miigo sa Cebu

3 ka mga tulis miigo sa Cebu
File photo

Tulo ka mga pagpanulis ang niigo sa nagkadaiyang mga dapit sa Sugbo sa Sabado, Nobiyembre 25, 2023.

Ang labing dako nga balor sa kantidad nga nakuha mao ang sa pawnshop nga nahimutang sa dalan Colon, Brgy. Kalubihan, dakbayan sa Sugbo.

Ang Oro Sugbo gitulis sa upat ka mga tawo nga ningpa­ila’ng mga sakop sa National Bureau of Investigation (NBI) nga pulos armado og tag-as nga kalibre sa armas alas 9:05 sa Sabado sa buntag.

Sa kuha sa closed circuit tele­vision (CCTV) camera sa Oro Sugbo, makita nga kalit lang nangabot ang upat ka wala mailhi’ng mga lalaki nga pulos naka ball cap ug naka face mask.

Gitiunan og armas ang guwar­diya ug gipahapa.

Ang duha nagsilbing look out samtang ang usa nisulod sa kahera nga maoy mikuha sa tanang bulawang mga alahas nga naa sa sulod sa estante gi-display.

Lain usab nga lalaki ang nisulod niini sa dako’ng bag.

Base sa timer sa CCTV, ang hitabo wa nilanat og dos mi­nutos.

Dali nga nanibat ang mga tulisan sakay sa duha ka mga motorsiklo nga naghuwat.

Sigun sa mga saksi nga niliko patuo ang mga tulisan sa dalan Leon Kilat ug wala na sila nasayod kon asa paingon.

Walay bisan usa ang nangahas sa pagtawag sa kapulisan samtang nagpadayon ang pagtulis tungod sa kahadlok.

Gani ang duha ka mga guwar­diya sa silingan nga tindahan ningtago sa sulod tu­ngod kay wala silay issue nga armas sa ilang security agency.

Sa pagkutlo ning balita, wala pa mohatag og kwentada ang Carbon Police Station kon pila ang kantidad sa mga alahas nga nakuha sa mga tulisan, apan base sa nangaging mga tulis, hayan minilyon ka pesos ang kantidad.

SAKSI

Matod sa usa sa mga tig-ayo og sapatos nga si alyas Jun nga pag-abot sa upat ka mga tulisan gitiunan dayon siya og pusil dayon gipasibat.

“Taas kaayo ang armas. Giingnan rako nga hawa diha. Nidagan nako didto kay pusilon pa lang ta, ako giingnan ang mga tawo nga ayaw mo'g agi diha kay gitulis ang pawnshop,” asoy niya.

Samtang si alyas Tata nga tiglimpyo’g alahas nga naka­kita sa tanang panghitabo nibutyag nga pagsulod sa mga suspek niingon, matod pa, ang usa nga “wanted ning guwardiya, mga NBI ni walay lihok.”

Base sa kuha sa CCTV, armado og M203 grenade launcher ug M4 rifle ang mga tulisan. Kini nga mga armas gi-issue lang alang sa military ug ubang law enforcers.

Si Police Major Miles Dumoslog, hepe sa Carbon police station, nibutyag nga dugay nga nakatawag og polis ang trabahante sa pawnshop.

Milanat pa og pila ka minutos una sila nakapanawag sa Carbon Police Station.

“Yan ang tingnan natin kung taga saan ito dahil mga high powered firearms yung dala nila. So i-conduct natin ang investigation,” matod ni Dumoslog.

Ila nga i-backtrack ang mga CCTV kay nagtuo siya nga planado ang pagtulis.

Sa pangutana kon nganong walay polis nga nakabantay sa downtown area, matod ni Dumoslog nga duna apan nag roving kini paingon sa laing block.

Apan dunay usa ka polis nga gipatawag sanglit wala sa iyang outpost sa dihang nahi­tabo ang insidente.

Siya nipasabot nga dunay gilakaw, apan gipasuwat siya og pagpasabot.

TOLEDO CITY

Gipukaw sa mga tulisan ang usa ka kanhi labor leader ug iyang pamilya sa ala 1 sa kaadlawon sa Sabado sa Purok Bagay 1, Brgy. Cantabaco, siyudad sa Toledo.

Ang biktima giila nga si Tony Cuizon, 67, biyudo apan may kapuyo, retiradong trabahante sa Carmen Copper ug presidente sa usa ka labor group kaniadto.

Ang biktima kuyog sa gini­kanan sa iyang kapuyo naka­mata sa ilang pagkatulog sa pag-abot sa tulo ka mga tawo nga nag-bonnet nga armado, nipahapa kanila.

Gihimas sa mga tulisan ang bag sa biktima nga may sud nga mga alahas, kuwarta ug importanting mga dokumento.

Human sa tulis, nanggawas sa main door ang mga tulisan pinaagi sa pagguba sa padlock gamit ang bolt cutter.

Nanibat ang mga tulisan sakay sa usa ka puti nga awto ug wa na maabti sa kapulisan.

Matod sa Toledo police ubos sa pagpangulo ni Police Lt. Col. Manolo Salvatierra, ang mga tulisan nakasulod sa bentana nga glass sliding nga wa na-lock.

Gibana-bana nga ang mga alahas nagkantidad og P500,000 samtang ang cash sama sab nga kantidad.

Way naunsa sa mga biktima kay wa sila ningsukol.

LILOAN

Samtang patay nang naka­p­lagan ang usa ka American national nga gibinaklid og gapos sulod sa ilang giabangan nga panimalay alas 6:05 sa buntag Sabado sa Purok Red Rose, Verrie Hills Subd., Brgy. Yati, lungsod sa Liloan.

Ang biktima giila sa iyang asawa nga si Doug Hiroshi Sugawara, 72, retired chef.

Si Police Major Eric Gingo­yon, hepe sa Liloan Police Station nga nahinabi sa Superba­lita Cebu, nagkanayon “tulis ug personal” ang motibo sa krimen nga ilang gisubay.

Matod ni Gingoyon nga ang asawa nga si Roxan Mandokita Sugawara, 30, taga Gingo­og city, diha sa pikas kwarto natulog.

Nakurat siya sa pagmata sayo sa buntag kay nakit-an niya iyang bana sa sawog nga walay panimuot nga nagkadugo ug dunay samad sa agtang.

Gibinaklid sa paggapos ang duha ka mga kamot ug mga tiil.

Nawala ang P1,200 cash, pitaka, nagkadaiyang ID ug importanteng butang. Posibling nisukol ang biktima ug napatay sa suspek.

Ikaduhang motibo personal grudge kay ang biktima daghang gikaaway sa silingan kay matod sa asawa tungod sa batasan sa iyang bana.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph