3 ka nuclear sites sa Iran giatake sa US
GIANGKON ni US President Donald Trump niadtong Dominggo, Hunyo 22, nga nahuman na ang pag-atake sa Estados Unidos sa tulo ka nuclear sites sa Iran, lakip ang “Fordow, Natanz ug Esfahan.”
"All planes are now outside of Iran airspace. A full payload of bombs was dropped on the primary site, Fordow," matud ni Trump sa social platform Truth Social.
Kinahanglan nga mouyon ang Tehran to "end this war," men-sahe ni Trump sa Truth Social human sa mga pag-atake.
Giila sa state-run Islamic Republic News Agency kon IRNA ang mga pag-atake sa nuclear facilities sa nasud.
Usa ka komentarista sa telebisyon sa estado sa Iran ang miingon nga "you started it and we will end it," sumala sa usa ka report sa CNN.
Walay plano si Trump og dugang nga pag-atake sa US sa Iran ug gusto niya nga "moduso sa Tehran balik sa negosasyon," matud sa CNN.
Ang CBS News miingon nga nakig-alayon ang Estados Unidos sa Iran sa diplomatikong paagi kaniadtong Sabado aron ipahayag nga mao ra kana ang plano sa US ug nga walay plano sa pagbag-o sa rehimen.
Ang desisyon ni Trump nga direktang mangilabot aron suportahan ang pagsulay sa Israel sa pagbungkag sa nuclear program sa Iran nagtimaan sa usa ka makasaysayanon nga paglala sa sitwasyon sa Middle East, matud sa lokal nga media.
Ang interbensyon mahimong makapukaw og panimalos gikan sa Tehran batok sa mga tropa ug military installations sa US sa tibuok rehiyon, gitaho sa lokal nga media.
Ang air raids sa US sa Iran nahitabo sa ikasiyam nga adlaw human gilusad sa Israel ang mga pag-atake sa Iran kaniadtong Hunyo 13.
Mipasidaan si Trump niad-tong Sabado nga ang Iran mag--atubang og daghan pang pag-atake kun dili dayon moabot ang kalinaw.
Sa iyang pagpamulong sa nasud niadtong Sabado sa gabii, giingon ni Trump nga ang mga importanteng pasilidad sa nukleyar sa Iran "hingpit ug bug-os nga nalaglag," ug ang umaabot nga mga pag-atake mahimong "mas dako pa ug mas sayon."
"If peace does not come quickly, we will go after those other targets with precision, speed and skill. Most of them can be taken out in a matter of minutes," matud niya.
Giingon ni Trump nga dugay na niyang gidesisyunan nga dili tugotan ang Iran nga ma-kabaton og armas nukleyar, ug kung walay kalinaw, adunay "trahedya" alang sa Iran nga labaw pa sa nahitabo na.
Samtang, ang Islamic Revolutionary Guard Corps sa Iran miingon "War starts right now," human gibutyag ni Trump ang malampusong pag-atake sa US sa tulo ka Iranian nuclear facilities.
Gipahayag ni Hassan Abedini, deputy political director sa state broadcaster sa Iran, nga gipabakwit na sa Iran kining tulo ka nuclear sites "sa dugay na nga panahon."
Nagpakita sa state-run television, siya miingon nga ang Iran "wala nakaangkon og dakong kadaot tungod kay nakuha na ang mga materyales."
Gipahibalo ni Trump kaniadtong Huwebes nga mohimo siya og desisyon “sulod sa sunod nga duha ka semana" aron hatagan ang Iran og katapusang kahigayonan nga makig-negosasyon. / Xinhua