3 ka pagpamusil ‘di alarming’

Cebu City map.
Cebu City map.

Tulo ka mga insidente sa pagpamusil sa dakbayan sa Sugbo nga nahitabo sa Sabado ug Dominggo, Nobiyembre 11-12, 2023, gihulagway sa kapulisan sa dakbayan sa Sugbo nga dili makaalarma.

Matod ni Police Lt. Colonel Janette Rafter, deputy city director for operations sa Cebu City Police (CCPO), nga pulos ilegal nga drugas ang anggulo ug motibo sa krimen.

Matod niya nga dili alarming ang sunodsunod nga pagpamusil sanglit dili man pareg­la ang motibo.

CALAMBA

Unang pagpamusil nahitabo alas 3:25 sa Sabado sa hapon, Nobiyembre 11, 2023 sa Dalan Katipunan, eskina sa A. Lopez, Barangay Calamba, dakbayan sa Sugbo.

Ang biktima giila sa Sawang Calero Police Station nga si Steve Rodriguez, taga Sitio Upper, Brgy. Poblacion Pardo, dakbayan sa Sugbo.

Ang biktima naglakaw sa dapit apan kalit lang giduol sa wala mailhing gunman ug gipusil gamit ang 9mm pistol tumong sa lawas niini.

Matod ni Police Major Francis Renz Talosig, hepe sa Sawang Calero Police station, nga nadakpan na niadtong June 20, 2023 ang biktima may labot sa ilegal nga drugas.

Sa imbestigasyon, nasuta nga duna kini ikakita sa lugar nga ginganlan og alyas ‘Negro.’

LABANGON

Samtang pagka Dominggo sa gabii, Nobiyembre 12, 2023, duha ka mga insidente sa pagpamusil ang nahitabo sa dakbayan. Una sa Sitio Santo Nino, Brgy. Labangon, ning dakbayan alas 8:09 sa gabii.

Ang biktima giila nga si Rico Entoma Filoteo, 32, taga A. Lopez Drive, Brgy. Calamba. (Lahi nga estorya sa pahina 2.)

Ang biktima giingon nga nagtindog daplin sa karsada, apan pipila ka gutlo ang milabay, kalit lang naabot ang duha ka wala mailhing killers nga sakay sa motorsiklo ug dayong pusil sa backrider.

Naigo sa ulo ang biktima hinungdan sa iyang hinanali nga kamatayon.

Sigun sa mga nakaila sa biktima sa lugar, giingong nalambigit sa pagpamaligya sa ilegal nga drugas ang biktima.

Gani sa paghiling sa lawas ani, dunay nakuha nga usa ka pakete sa gituohang shabu sa iyang bulsa.

GUADALUPE

Samtang pagka alas 11:20 sa samang gabii, laing pagpamusil nahitabo sa Dan M. Velez, Barangay Guadalupe.

Ang biktima giila nga si Georsua Geraldine Labiste, 53, taga Abellana Extension, Barangay Guadalupe.

Wala pay matumbok nga responsabli ang kapulisan sa Guadalupe apan mihimo na sila og imbestigasyon sama sa pagsusi sa mga kuha sa CCTV camera sa dapit.

Matod ni Rafter, gimandoan sa CCPO ang matag police station nga pangitaon ug dakpon ang mga killer aron mapasakaan og kaso.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph