Gibawian sa Land Transportation Office (LTO) 7 og mga lisensya ang tulo ka mga drayber sa public utility vehicle (PUV) human nagpositibo ang ilang confirmatory test sa paggamit og ilegal nga drugas.
Gibutyag ni LTO 7 Regional Director Glen G. Galario nga ang tulo ka drayber nagpositibo atol sa random drug testing nga gihimo sa North ug South Bus Terminals sa Sugbo niadtong Holy Week sa Abril.
“Pag-positibo nila atol sa among random inspection, kinahanglan namo magpahigayon og confirmatory tests sa dili pa namo hingpit nga bawion ang ilang mga driver’s license,” matod ni RD Galario.
Dugang niya nga ang tulo mao ang una nga mga drayber sa public utility vehicle nga nabawian og lisensya karong tuiga 2025.
“Kini pahimangno ni sa tanan natong mga driver dili lang sa pampubliko nga mga sakyanan apan sa tanan nga nigamit sa atong kadalanan. This is to ensure nga dili lang ang atong mga sakyanan ang road worthy but including our drivers, if they are fit to be on the roads,” matod ni Galario.
Gipahinumdoman sab niya ang publiko nga ang paghupot og driver’s license dili usa ka katungod, kondili usa ka pribilehiyo alang niadtong angayan nga makabaton niini.
“Dili tanan pwede makakuha anang driver’s license. We have been very strict with our requirements for getting a driver’s license. Gikan sa certificates from our accredited driving schools to taking the necessary exams before one can possess a driver’s license.”
Gikan sa Enero 1, 2025, hangtod Hulyo 22, 2025, nakabawi sab ang LTO 7 og 12 ka mga driver’s license tungod sa pagkabaton og labaw sa 40 ka demerit points.
Gisuspenso sab sa ahensiya ang 411 ka mga driver’s license tungod sa nagkalainlaing kalapasan.
Sulod sa samang panahon, girekomendar sab sa LTO 7 nga bawion o suspendihon ang mga lisensya sa 28 ka mga driver’s license holder tungod sa nagkalainlaing kalapasan sama sa mga aksidente sa dalan ug mga kalapasan nga nakuhaan og video nga nag-viral online.
Nipagawas sab ang LTO 7 og temporary operator’s permits ug/o gisuspenso ang mga driver’s license sa lima ka vloggers tungod sa mga kalapasan sa traffic laws sa unang tunga sa tuig sa 2025. /