TULO ka mga salin nga miyembro sa Squad 2, Island Committee (IC) Levox sa Eastern Visayas Regional Party Committee (EVRPC) ang namatay atol sa engkuwentro batok sa mga tropa sa 93rd Infantry (Bantay Kapayapaan) Battalion, Philippine Army, niadtong Miyerkules, Hunyo 18, 2025, sa hilit nga bahin sa Barangay Cogon, Carigara, Leyte.
Si Lt. Col. Charlie Saclot, commanding officer sa 93rd Infantry Battalion, niila sa mga namatay nga sila si Juanito P. Sellesa Jr. alyas Tibor, usa ka executive committee member sa IC Levox; Eugene Paclita alyas Dimple, squad leader sa Squad 2; ug Lito D. Laurente alyas Dodong, usa ka squad member.
Nakuha gikan sa taguanan sa grupo ang usa ka M16 rifle nga dunay duha ka taas nga magasin, usa ka kalibre .45 nga pistola nga dunay duha ka magasin, usa ka granada, personal nga mga butang, ug mga dokumento.
Sila si alyas Tibor ug ang iyang grupo gipangita tungod sa pagpatay kang Jesus Sarcilla, nailhan usab nga Sosing, sa Barangay Binibihan, Carigara, Leyte niadtong Disyembre 7, 2021.
Si Sarcilla gipatay atubangan sa iyang anak nga babaye nga si Zosima Sarcilla bisan pa nga naghatag na kaniadto og
pagkaon ug kapuy-an sa grupo.
Gawas sa mga kasong kriminal nga gipasaka atubangan sa Regional Trial Court, usa ka kaso sa paglapas sa internasyonal nga humanitarian law ang gipasaka sab batok sa grupo ni Tibor sa Branch 48 sa Regional Prosecution Office 8 sa Commission on Human Rights Regional Office 8. / PR