Tulo na lang ka senatorial candidates gikan sa administrasyon ang wa pa ma-endorso sa One Cebu Party nga pinangulohan ni reelectionist Cebu Gov. Gwendolyn Garcia alang sa 2025 midterm election.
Sukad nagsugod ang lokal nga pangampanya sa Marso 28, labing minos walo na ka mga kandidato sa pagkasenador ang giendorso ni Garcia sa duha ka managlahing campaign sorties sa southern ug northern Cebu.
Niadtong Biyernes, Abril 11, giendorso ni Garcia ang kandidatura ni kanhi Senador Panfilo Lacson ug kanhi Senate president Tito Sotto, reelectionist Sen. Pia Cayetano, ug aspirant Camille Villar atol sa proclamation rally ug campaign rally sa partido sa pipila ka lungsod ug siyudad sa northern Cebu.
Unang giendorso ni Garcia nga sila si reelectionist Sen. Ramon “Bong” Revilla, Francis Tolentino ug aspirants nga sila Benhur Abalos ug kanhi senador Manny Pacquiao, atol sa ilang pagtuyok sa 16 ka lungsod sa Southern Cebu niadtong Marso 28.
Ang senatorial candidates sa Alyansa para sa Bagong Pilipinas nga partido ni Presidente Ferdinand Marcos Jr. nga wala pa makadawat og endorsement gikan sa One Cebu Party mao sila si Makati Mayor Abby Binay, Sen. Lito Lapid ug ACT-CIS Partylist representative Erwin Tulfo.
Gipahibalo ni Garcia nga ang partido "seryoso nga naghunahuna" nga limitahan ang suporta niini sa mga kandidato gikan sa Alyansa.
Dugang pa niya nga ang nahabilin nga tulo hangtod upat sa "magic 12" maggikan sa lahi nga partido.
Ang pag-anunsyo ni Garcia nigawas human nibisita sa Cebu North Bus Terminal niadtong Abril 4 si Senador Raffy Tulfo, kinsa misaway sa pagpangolekta og bayad sa pansayan sa pasilidad. /EHP