3 ka spa, bar dunay ‘extra service’ gi-raid

3 ka spa, bar dunay ‘extra service’ gi-raid
MGA GRO: Kabahin sa guest relation officers (GROs) sa usa ka KTV bar nga giluwas sa National Bureau of Investigation - Cebu District Office (NBI-Cebdo) sa dakbayan sa Mandaue niadtong Hunyo 21, 2024. / Gikan sa NBI-Cebdo

Tungod sa giingong pagha­tag og ‘extra service’ sa mga kustomer nga lalaki, 26 ka mga babaye nga guest relation officers (GROs), ang naluwas sa mga ahente sa National Bureau of Investigation - Cebu District Office (NBI-Cebdo) nunot sa pagpangronda sa tulo ka mga establisemento sa dakbayan sa Mandaue.

Ang operasyon nahitabo niadtong Hunyo 21, 2024, diin nga gitarget sa NBI 7 ang JTV Bar, Mjozi Massage and Spa, ug Art Spa.

Ang NBI-Cebdo niingon nga ang JTV Bar, nahimutang sa dan A.S. Fortuna sa Barangay Banilad, gironda human nitumaw ang mga taho gikan sa mga nagpakabana nga mga lungsuranon bahin sa mga empleyado niini nga nagprostitusyon.

Giluwas sa mga ahente ang 20 ka babaye gikan sa bar.

Usa ka babaye nga nagsilbi nga “mamasang” (manager), nasikop atol sa operasyon.

Ang pagpangronda gihimo human gikompirmar sa duha ka secret agents sa NBI nga nagpakaaron-ingnong kustomer ug nakompirmar ang illegal nga kalihokan.

Ang mga kustomer sa bar gikataho nga gitanyagan og unlimited nga mga ilimnon sa bayad nga P600 ug dayon gipailaila sa “customer care assistants” (CCAs) sa manedyer sa bar.

Usa ka CCA nisugyot sa NBI secret agent nga makahimo siya sa ‘intimate interactions’ o ilang gitawag nga “dohan,” usa ka Japanese word alang sa “accompany” o “going toge­ther,” alang sa dugang bayad.

Nasikop usab ang usa ka supervisor sa maong bar.

Sa Mjozi Massage and Spa, gi-rescue sa mga ahente sa NBI-Cebdo ang tulo ka therapists ug gidakop ang tag-iya.

Ang maong establisemento gikatahong nagtanyag og lingam, usa ka matang sa masahe nga naglambigit sa pagpukaw sa male sex organ o lingam massage sa kantidad nga P900.

Giingong gitugotan usab sa mga therapist nga matandog ang ilang pribadong parte sa lawas nga may bayad.

Ang NBI-Cebdo nipahigayon og entrapment operation sa Art Spa sa dalan A.S. Fortuna, nga miresulta sa pagkasikop sa front desk attendant sa spa ug pagluwas sa tulo ka therapists.

Nakuha gikan sa empleyado ang marked money nga gigamit sa mga undercover agent.

Gidala sa Department of Social Welfare and Development ang mga naluwas.

Kasong kalapasan sa Republic Act 10364 o Expanded Anti-Trafficking in Persons Act of 2012 ang gipasaka batok sa mga suspek. / Dugang ni CAV

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph