Mopasaka og kaso ang Talisay City Police Station sa tulo ka mga suspek sa pagpusil-patay sa 14 anyos nga tinun-an nga babaye samtang nag-module kini sud sa ilang balay sa V.H. Garces, Barangay Cansojong, dakbayan sa Talisay niadtong April 26, 2024.
Matod ni P/Lt. Col. Epraem Paguyod, hepe sa kapulisan sa dakbayan sa Talisay, nga ang tulo ilang pasakaan og kasong reckless imprudence resulting in homicide ug obstruction of justice diin usa niini babaye.
Samtang ang tag-iya sa armas ilang ikiha og illegal possession of firearms human makuha sa mga imbestigador ang revolver apan ang bala 9mm.
Wala mohatag og pangalan si Paguyod kinsa ang pasakaan og kaso apan giingong kaila ra kini sa biktima nga si Jacquiline Reponte diin ang usa ani nga suspetsado nalambigit sa illegal nga drugas ug naa pa sa provisional status.
Usa sa mga saksi nga dili magpaila nibutyag sa Superbalita Cebu nga dili tinuyo ang maong insidente tungod kay ang nahitabo nahulog ang armas sa suspetsado ug mibuto kini diin ang bala naigo sa nawong sa biktima.
Nahitabo kini dili alas 6:00 sa buntag nga unang gibutyag sa igsuong babaye sa biktima apan alas 7:00 na sa buntag.
Sa dihang mibuto ang armas nga wala matuyo, natarantar na silang tanan unsaon ang biktima, gani, usa kanila ang misugyot nga dalhon sa tambalanan apan dili motug-an nga naigo sa armas sanglit isulti lang sa doktor nga natagak ang biktima.
Apan usa sa mga kabanay ang mihatag usab og suhestiyon aron matabonan ang krimen nga kon dunay police nga moimbestigar, isulti nga dunay tawo nga misulod sa balay ug dayong pamusil sa biktima.
Ang maong saksi mihatag na og pinanumpaang pamahayag sa kapulisan nga iapil sa mga ebedensya nga ilang iduso sa buhatan sa piskaliya sa dakbayan sa Talisay karong adlawa, Lunes, Abril 29, 2024. / AYB