3 ka suspek sa tulis nasikop

SunStar Dumanjug
SunStar Dumanjug

Usa ka 19-anyos nga lalaki ug iyang mga kakunsabo nasikop sa kapulisan sa lungsod sa Dumanjug human giingong nalambigit sa pagpanulis niadtong Dominggo sa gabii, Hunyo 30, 2024, sa Barangay Balaygtiki.

Ang unang suspek giila lang sa alyas nga ‘Emjem’ kay ang tinuod nga ngan gipugngan subay sa polisiya sa kapulisan, ug duha ka mga menor de edad.

Nasikop ang mga suspek sa hot pursuit sa kapulisan nga gipangulohan ni P/Capt. Kelvin Mamaradlon.

Ang biktima nipasaka og reklamo batok sa mga suspek tungod sa pag-ilog sa iyang cellphone nga nagbalor og P30,000.

Matod pa sa biktima nga padulong siya sa Barangay Balaygtiki sakay sa iyang motorsiklo.

Sa dihang hinunong siya aron magpakisayod sa iyang direksyon ngadto sa usa ka babaye nga nagbarog usab kilid sa kadalanan, gitulis siya pasado alas 11 sa gabii pinaagi sa pagbabag ug nition og tubo.

Samtang ang kakunsabo maoy nikupot sa iyang jacket dungan sa pag-ingon nga tulis ang ilang katuyuan.

Dali nga niiskapo ang mga suspek samtang ang biktima nisumbong sa kapulisan aron sa pagsikop kanila.

Nasikop ang mga suspek pasado alas 11:00 sa buntag sa Lunes, Hulyo 1, 2024 human sila positibo nga gitumbok sa biktima ug nabawi usab ang cellphone isip ebidensya.

Nabalhug si Jemjem sa Dumanjug Police Station aron pasakaan og kaso sa pagpanulis samtang ang duha ka mga kakunsabo niini nasuta nga mga menor de edad ug tua sa kustodiya sa buhatan sa Municipal Social Welfare and Development.

‘’Sa walay baynte kwatro oras, nasikop ang mga suspetsado tungod sa paspas nga aksyon sa atong kapulisan. Kini nagpamatuod nga ang Dumanjug PNP naningkamot nga masulbad ug mapugngan ang krimen alang sa seguridad ug hapsay nga komunidad sa atong lungsod,” matod ni Mamaradlong. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph